Konseisao e Taremi paralajmërojnë: Zikaltrit s’do ta kenë të lehtë në “Dragao”!

Portugezët sfidojnë për ndeshjen e nesërme në Champions League

Nesër Interi do të zbresë në fushë në “Dragao”, aty ku e pret Porto për ndeshjen e kthimit të fazës së 1/8-ave të Champions League dhe sipas asaj që paralajmërojnë protagonistët portugezë, zikaltrit nuk do ta kenë aspak të lehtë. Rezultati 1-0 ndeshjes së parë sigurisht që nis të avantazhuar italianët, por ekipi i Konseisaos ka treguar gjithmonë se nuk është një rival i lehtë për t’u përballuar në shtëpi dhe këtë e ka pohuar vetë trajneri, ashtu si ylli i ekipit Mehdi Taremi.

KONSEISAO E TAREMI – Duke e ditur se në kompeticione të tilla janë detajet ato që bëjnë diferencën, trajneri ka kërkuar që skuadra e tij të jetë perfekte dhe

ka paralajmëruar se do të japin përgjigjen e duhur në fushë. “Ne kemi bërë disa gabime në ndeshjen e fundit ndaj Interit dhe në atë në kampionat pamë po ashtu që gabimet individuale mund të na ndëshkojnë. Nuk mund të jemi gjithmonë në maksimumin tonë, por vijmë nga një cikël ndeshjesh shumë i rëndësishëm,

ku kemi regjistruar vetëm humbjen me Interin dhe një tjetër në kampionat pas tyre. Të martën do të jetë një supersfidë, shumë e rëndësishme, por ne do të jemi në fushë për të dhënë përgjigjen e duhur”, u shpreh tekniku, deklaratë që u pasua edhe nga ajo e sulmuesit Taremi. “Në ‘Dragao’ do të bëjmë maksimumin tonë për të marrë rezultatin pozitiv për kualifikimin. E dimë që nuk është e thjeshtë, por as e pamundur dhe kemi çdo gjë për të bërë një ndeshje të mirë. As Interi nuk do ta ketë të lehtë dhe për këtë u kërkoj tifozëve tanë që të na mbështesin, pasi të gjithë e dimë mirë sa fuqi ka ai stadium dhe sa na motivon”, përfundoi iraniani.