Arsenali me ritëm kampioni, Kasemiro tradhton “Djajtë”

Arsenali kalon me vota të plota testin e Ful hamit. Në "Craven Cottage", gjithnjë një fushë e vështirë, kryesuesit luajnë si pretendentët kryesorë për titull për 90 minuta, ndërkohë që skuadra tjetër londineze luajti një takim me nivel vetëm në pjesën e dytë. "Topçinjtë" i mbyllën llogaritë që në pjesën e parë, falë golave të Gabrielit, Martinelit dhe Odegardit në shtesë, i cili hipotekoi 3 pikët që e rikthyen në +5 pikë distancën me Sitin ndjekës. Skuadra e Mikel Artetës, teknikut spanjoll që regjistroi fitoren e tij të 100-të në stolin e Arsenalit, konfirmohet solide në mbrojtje, ndërsa nuk u la mundësi frymëmarrjeje djemve të Marko Silvës. Arsenali që pa të rikthehej në fushë pas 3 muajsh edhe Gabriel Zhezusin pas operacionit në gju, u bë skuadra e parë në historinë e kampionatit anglez që fiton 5 derbe radhazi jashtë fushe pa pësuar gol. "Topçinjtë" i kanë fituar 5 javët e fundit të Premier Ligës: 10 fitore në 11 javët e mbetura i shpallin ata automatikisht kampionë. Por ndoshta nuk do të duhet të mbërrijnë deri në këtë pikë, në rast se kampionët e Guardiolës do të lënë pikë rrugës.

NGEC JUNAJTID - Sauthempton mbetet në fund të renditjes së Premier Ligës pasi arritën të fitojnë vetëm 1 pikë ndaj Junajtidit të mbetur me 10 veta për gati një orë lojë në "Old Trafford". Kartoni i dytë i kuq i Kasemiros këtë sezon u dhuroi "Shenjtorëve" avantazhin numerik, por ata nuk arritën ta shfrytëzojnë atë pavarësisht se iu afruan golit në shumë raste. Por edhe përpara largimit të mesfushorit brazilian nga fusha për një ndërhyrje të rrezikshme ndaj Alkarazit, De Gea shpëtoi portën nga një goditje me kokë e Uollkotit. Pastaj ndali me një dorë sërish një tentativë të ish-sulmuesit të Arsenalit. Miqtë goditën edhe dy herë shtyllën, por Junajtid protestoi për një prekje të topit me dorë në zonë nga Koçap, por VAR-I nuk ndërhyri.