“Bomber” nga mbrojtja, Perja: U çliruam
BESA/ Kapiteni pret vazhdimësi: Nëse nuk vazhdojmë me fitore, goleada s’ka vlerë
Ka festë te Besa. Pas seancës së djeshme të stërvitjes, për ekipin është shtuar një drekë. Kushdo mund të mendojë se “sebepi” ishte ajo fitore e thellë me Turbinën. Por jo, nuk ishte ky motivi. Trajneri Gugash Magani mbushte 58 vjeç dhe ka menduar që këtë ditë të shënuar ta kalojë me stafin e tij të ngushtë dhe futbollistët. Dhuratën e mori dy herë më herët, kur kavajasit shpërthyen në gola. Kishte aq kohë që trajneri kritikonte mungesën e shënjestrës dhe ja, lojtarët u korrigjuan. Këtë e thotë për “Panorama
Sport” edhe kapiteni Skerdian Perja, që ishte protagonist me dy golat e tij: “E ku ka më mirë sesa të festojmë ditëlindjen e Maganit pas asaj fitoreje të bukur. Kjo fitore sikur erdhi me porosi për ditëlindjen e trajnerit, të cilit i uruam edhe 100 vite të tjera”. Duke u kthyer te fitorja me Turbinën, qendërmbrojtësi shprehet se Besa nuk bëri ndonjë gjë ndryshe në lojë, thjesht u treguan të saktë. “Ata që ndoqën takimin nuk është se panë një Besë ndryshe nga ndeshjet e tjera. Dallimi qëndron në faktin se këtë herë nuk falëm rastet e pastra duke nisur nga unë. Jam i kënaqur që i hapa udhë asaj fitoreje, që erdhi pas rezultateve tona jo të mira. Kjo fitore pati edhe të veçantat e saj, pasi të dy sulmuesit arritën të shënojnë. Me shaka, pas takimit i thashë Hoxhës se shënoni ju sulmuesit se pastaj do të detyrohem të shënoj unë” (qesh), theksoi 32-vjeçari. Kapiteni shprehet se kjo fitore nuk do të kishte vlera nëse nuk pasohet me të tjera fitore. “Ju e keni parë se si u mund Dinamo apo Flamurtari, çfarë tregon se deri në fund do të jetë një “luftë” e vërtetë ku secili ekip do të synojë të arrijë objektivat e tyre. Që do të thotë, se vërtet mundëm Turbinën që e quaj thjesht një detyrë tonën, por ajo nuk mjafton nëse nuk e pasojmë me të tjera fitore. Në fundjavë do të luajmë derbin e vogël me Luzin dhe do të jetë një ‘transfertë’ mjaft e vështirë. Po ashtu, edhe dy tifozëritë që në fakt janë një, do të kenë luksin të duartrokasin këdo që do të fitojë si Besën ashtu edhe Luzin. Do të jetë sfida brenda familjes”, përfundoi Perja. FERIZ FERIZAJ