Thellohet kriza, dorëhiqet Bano
Alert Alcani bëhet trajneri i pestë për këtë sezon: Nuk dorëzohem, luftojmë për mbijetesën
Besëlidhja/ Vetëm gjashtë javë zgjat aventura e lushnjarit, largohet pas humbjes në Orikum
Dorëzohet edhe Ar tan Bano. Trajneri ka dhënë dorëheqjen nga Besëlidhja. Humbja e pësuar në Orikum, e ka detyruar që ta mbyllë këtu rrugëtimin e tij. Vetëm 6 javë zgjati aventura e tij në krye të lezhjanëve, duke marrë 1 fitore, 2 barazime dhe 3 humbje. Edhe pse skuadra rezistoi 90 minuta ndaj orikasve, në shtesë u ndëshkua. Një gol i marrë që shuan thuajse çdo shans për shpëtim. Edhe pse matematika i mban në lojë, mundësitë për të evituar minimalisht rënien direkte, janë gati-gati inekzistente. Në këto rrethana, lushnjari u largua nga drejtimi teknik i Besëlidhjes. Nga kjo e hënë, “timoni” i ka kaluar Alert Alcanit. Erdhi para dy javësh si drejtor teknik, por tashmë do të jetë trajneri i ri dhe i pesti për këtë sezon. Kujtojmë që kampionatin e nisi Alban Bruka, e vijoi Hasan Hoxha dhe më pas iu dorëzua Nikolin Çoçllit. Kur korçari dha dorëheqje erdhi Artan Bano, ndërsa tani e mori Alert Alcani. Ky i fundit konfirmon këtë ndryshim për “Panorama Sport”. Lezhjani mundohet që të mbajë gjallë edhe shpresën për shpëtim. “Humbja në Orikum e thelloi krizën dhe detyroi Artan Banon të dorëhiqej. Duhej të fitohej ajo ndeshje, pasi ishim ne ata që e kontrolluam lojën, por nuk arritëm që t’i finalizonim rastet nga presingu i vazhdueshëm që i bëmë kundërshtarit. Po nuk shënove pëson dhe ne u ndëshkuam në shtesë. Situata është me të vërtetë dramatike, por jo e pakapërcyeshme. Në lojë kemi edhe 21 pikë në 7 ndeshjet e mbetura. Kalendari na favorizon,
pasi 4 i kemi në shtëpi. Nëse i fitojmë do të shtojmë rrugën drejt shpëtimit. Tashmë jemi të përqendruar te Skënderbeu, që po e vlerësojmë maksimalisht, pasi duhet dhe do ta fitojmë. Gjatë fazës së parë morëm pikë në Korçë, ndaj në Lezhë kemi shanse më
shumë. Do t’i marrin ndeshjet me radhë, ndaj tani të gjitha energjitë i kemi të përqendruara te java e 20-të. Jo vetëm se shpresoj, por jam i bindur se do të mbijetojë në Kategorinë e Parë. Diferencat e vogla me rivalët, na japin prioritet ne”, përfundoi Alcani.