Asnjë humbje, por Gvozdenoviç kritikon: Kemi edhe shtatë finale
SKËNDERBEU/TRAJNERI, në analizë me ekipin pas fitores me Tomorin
Skënderbeu rimori kreun e renditjes pas fitores ndaj Tomorit, edhe pse me një lojë jo fort të denjë për kërkesat e trajnerit bardhekuq, Ivan Gvozdenoviç. Pavarësisht se kanë marrë maksimumin e mundshëm nga kjo ndeshje, trajneri i korçarëve ka kritika për të tijtë dhe një gjë të tillë e ka shprehur edhe në analizën e zhvilluar dje me ekipin. Duke parë ngarkesën emocionale që korçarët kanë reflektuar kryesisht në dy ndeshjet e fundit kur nuk janë treguar plotësisht të qartë në fushën e lojës, Gvozdenoviç ka vendosur të reagojë. Burime të “Panorama Sport” tregojnë se numri një i pankinës korçare ka kërkuar nga lojtarët e tij që të mos mendojnë për planet afatgjata, por të shohin vetëm ndeshjen e radhës dhe të shmangin ngarkesat e jashtme emocionale. Gvozdenoviç ka kërkuar nga të tijtë, që shtatë ndeshjet e mbetura të trajtohen si shtatë finale dhe të mos ndikohen aspak nga rrjedha e kampionatit. “Jemi në një pikë kyçe të sezonit, dhe duhet të japim në çdo ndeshje maksimumin. Në shtatë javët e mbetura të garës duhet të bëjmë më të mirën dhe të mendojmë vetëm për rrugëtimin tonë. E dimë që do të ketë vështirësi dhe ngarkesë emocionale, por kjo është ajo që ne duhet të shmangim. Ndaj, kërkoj që djemtë më me eksperiencë të japin maksimumin e tyre, duke orientuar edhe të rinjtë për të shmangur presionin e akumuluar. Unë kam besim te ju.
Objektivi final është tejet i rëndësishëm, por duhet të marrim gjithçka me një përqendrim maksimal”, theksoi, ndër të tjera, trajneri i Skënderbeut.
REZULTATET- Korçarët vetëm me një javë distancë janë kthyer sërish në krye dhe kjo ka ardhur përmes një performance të denjë, që të jep përshtypjen e rezultateve të Skënderbeut të madh. Vetëm në 10 javë me në krye Ivan Gvozdenoviç, bardhekuqtë kanë mundur të marrin shtatë fitore dhe tri barazime duke grumbulluar 24 pikë. Skënderbeu i sezonit të kaluar i kishte ëndërr paraqitje të tilla. Në rrjedhën logjike të këtyre rezultateve, duket se trajneri kërkon vijimësinë dhe nëse do ta ketë, rikthimi direkt në Superiore nuk do të ishte problem. LLAZI SARO