Zhiru s’mjafton më, Salernitana fut Milanin në telashe
Dia i përgjigjet francezit, Ibra nuk bën dot diferencën
Dy ndeshje pa fitore, kuqezinjtë pa italianë pas 28 vitesh
Krahasuar me fitoren ndaj Totenhemit, Pi oli hedh në fushë Benaserin krah Kurniçit, teksa në krahun e djathtë Salmakers merr vendin e të dëmtuarit Mesias, duke bërë që Milani të hidhte një formacion fillestar pa asnjë italian për herë të parë pas 28 vitesh. Sfida nis me vendësit që marrin frerët e lojës, por pa mundur të jenë të rrezikshëm. Për një goditje në portë duhen pritur më shumë se 10 minuta kur tentativa e Leaos përplaset në trupin e Giomberit. Portugezi është përsëri protagonist disa minuta më vonë, kur një goditje e tij për pak sa nuk shndërrohet në asist për Diazin, por sfera prehet në fundore. Edhe Salernitana krijon rastet e saj duke përfituar nga gabimet e kuqezinjve. Në goditjen e parë është Kruniç që devijon në këndore, ndërsa në rastin e dytë nevojitet një mrekulli e Menjasë që ndal Dian, i cili po shkonte i vetëm drejt portës pas një gafe të Çaut. “Djalli” kupton se është momenti për të rritur xhirot dhe Hernandez tenton nga distanca, teksa për golin e avantazhit nevojitet një këndore gjatë së cilës Zhiru ngrihet më lart se të gjithë për golin e tetë për të në kampionat.
SA PAK MILAN - Fraksioni i dytë është një kopjet e të parit me vendësit që kërkojnë dyfishimin e shifrave dhe Salernitanën që pret të ndërtojë kundërsulmin vrastar. Dhe në fakt ashtu ndodh, teksa në minutën e 61-të mjafton një vendosje e gabuar e Milanit për t’i dhënë mundësi Dias të barazojë shifrat. Pioli mundohet të marrë masa duke hequr nga fusha e lojës Leaon, Zhirunë dhe Diazin për t’i lënë vend Ibrës, Origin dhe De Ketelares. Zgjedhja rezulton e gabuar pasi “Djalli” has vështirësi në ndërtimin e manovrës dhe rreziqet e vetme i regjistron me topa të gjatë. Një herë është Kalulu që i heq golin Ibrës duke prekur topin me dorë, teksa më pas janë duart e Oçoas që bën dy mrekulli ndaj suedezit. Shansi i artë do të ishte një penallti, të cilën La Pena e akordon, por më pas e heq me ndihmën e VAR-IT. Minutat e fundit janë vetëm copëza loje pasi Salernitana mundohet të ulë ritmin e të humbë kohë, ndërkohë që as dëshpërimi kuqezi nuk sjell fitoren. Me këtë barazim Milani konsolidon vendin e katërt me një pikë më shumë ndaj Romës, ndërkohë që në fundjavë do të ketë një transfertë të ndërlikuar me Udinezën.