Mbahet trofeu “Dita e Verës”, dyrrotakët e bëjnë festë në Elbasan
Federata Shqiptare e Çiklizmit, në kuadër të kalendarit sportiv 2023, vijon garat e sezonit. Të dielën në Elbasan u zhvillua gara “Trofeu i Ditës se Verës”. Të pranishëm në këtë aktivitet ishin edhe ministrja e Arsimit dhe Sportit, Evis Kushi, gjithashtu edhe kryetari i Bashkisë Elbasan, Gledian Llatja. Në ketë event, Federata Shqiptare e Çiklizmit ka marrë iniciativë të rëndësishme, ku në çdo qytet që do të organizohet një garë çiklizmi do të mbillet një pemë, kjo nismë shërben për të sensibilizuar të gjithë të rinjtë që merren me sportin e çiklizmit dhe për të pasur një jetë të shëndetshme. Në fillim të aktivitetit, Akademia Olimpike Shqiptare ka zhvilluar “Ditën Olimpike” duke performuar me nxënësit e shkollave të Elbasanit. Më tej ishte radha e garave, teksa në orën
11:00 ka startuar zyrtarisht ajo për kategorinë Kadetë. Pas përfundimit të 5 xhirove cirkuit në qytetin e Elbasanit, vendin e parë e zuri sportisti Mikail Pali i Klubit sportiv Skënderbeu. Për kategorinë
Juniorë, pas 10 xhirove cirkuit, i pari në finish mbërriti sportisti Emil Priftaj i ekipit të Tiranës. Kategoria Elitë/u-23 pati një rivalitet të lartë, ku pas 10 xhirove cirkuit vendin e parë e fitoi sportisti i Tiranës,
Lukas Sulaj Kloppenborg. Ndërsa në radhët e femrave triumfoi Klea Shehaj. SKËNDER ANXHAKU – “Falënderoj Komitetin Olimpik dhe Akademinë Olimpike pasi sollën këtu sot edhe flakën olimpike dhe përfitoj nga rasti të falënderoj edhe Ministrinë e Arsimit dhe të Sporteve për mbështetjen që na kanë dhënë”, deklaroi ndër të tjera për “RTSH Sport” presidenti i FSHÇ-SË Skënder Anxhaku. “Ishte një garë shumë e fortë. Kisha rivalë gjatë garës dhe më pëlqeu shumë kompeticioni”, u shpreh Lukas Sula Kloppenborg pas fitores së garës. Ndërsa Emil Priftaj e komentoi kështu triumfin: “Rivali më bëri që të jepja më të mirën gjatë garës”. Kështu, Elbasani ka nisur ngritur siparin e festimeve me eventin e çiklizmit, ndërsa gjithçka do të kulmojë sot me festën e madhe “Dita e Verës”.