Hallaçi: Na mohuan penallti

“Dominuam dhe i kishim mundësitë, u ngarkuam pak nga ambienti”

Trajneri i Kukësit nuk ka dyshime: 11-metërsh i pastër, ishte si mundje

Kukësi është eliminuar nga Kupa e Shqipërisë, por përtej keqardhjes, trajneri Rraman Hallaçi është ndalur tek episodi i diskutueshëm në kohën shtesë, ku skuadrës së tij iu mohua një penallti. Në prononcimin pas ndeshjes, kreu i pankinës verilindore theksoi se rasti i duelit mes Barbosës dhe Albion Markut ishte si në mundje. Sipas tij, 11-metërshi nuk duhej diskutuar, teksa ndeshja mund të shkonte 3-1 nëse arbitri Juxhin Xhaja e akordonte. “Së pari, keqardhje për eliminimin, pasi ishin mundësitë dhe kishim skuadër që mund të kualifikohet. Tashmë këtë rezultat e ka marrë historia dhe duhet të shohim para. Ndoshta skuadra ishte e ngarkuar pak nga ambienti i ngrohtë që kishim me stadiumin e mbushur. Unë u thashë herë pas here që të luanim topin poshtë. Ekipi u afrua te porta, ndërsa goditëm disa herë duke rrezikuar. Mbajtëm topin, por pjesa e dytë ishte më e mirë se e para. I thashë ekipit të jemi të kujdesshëm se do të vinte momenti dhe rasti. Krijuam volum loje, sidomos në pjesën e dytë, ku bëmë lëvizjet për të ndihmuar skuadrën edhe me një lojtar mangët. Rrezikuam bindshëm, por të vjen keq, sepse

ndoshta mund të kishim shfrytëzuar më mirë ato momentet në fund”, ka thënë fillimisht trajneri i Kukësit. “SI NË MUNDJE” Hallaçi komentoi më pas rastin e pretendimit të Barbosës për penallti. “Është shumë e thjeshtë, topi është

pas shpinës së mbrojtësit. Marku i Teutës nuk sheh për topin, por ka vënë dorën e djathtë te mesi i Barbosës. Dhe nëse dora është te mesi, nuk e lejon të shkojë sulmuesin te topi. Është shumë e thjeshtë, pasi nëse kemi kapje të tilla, fillon dhe quhet

mundje pastaj. Është situatë shumë e pastër, që duhet të jepet penallti. Nuk e lejon të shkojë sulmuesin te topi dhe në këto situata nuk ke çfarë e diskuton më”, përfundoi Hallaçi në prononcimin pas ndeshjes për “Oversport”.