Teuta rimerr fronin, Tirana i tregon forcën Besëlidhjes
Bardheblutë në superformë, Hysenagolli bën diferencën
BASKETBOLL/ Durrsakët thyejnë Kamzën në transfertë
Superliga e basketbol lit të meshkujve ka kompletuar dje javën e 16-të me dy takime tepër të forta. Teuta ka shënuar një sukses të rëndësishëm në transfertë kundër Kamzës, me durrsakët që rimarrin kryesimin e kampionatit, duke përfituar më së miri nga humbja e Besëlidhjes. Lezhjanët u thyen në kryeqytet nga Tirana. Bardheblutë janë krejtësisht një tjetër skuadër në javët e fundit, teksa kanë regjistruar fitoren e katërt radhazi dhe duket se po gjejnë formën e tyre më të mirë në pjesën më të rëndësishme të sezonit.
KAMZA-TEUTA - Teuta ka marrë një fitore me vlera në një fushë ku shpeshherë ka hasur vështirësi, siç është transferta e Kamzës. Kampionët në fuqi fituan me rezultatin 73-78 në një takim me rivalitet, të luftuar deri në fund. Sfida nisi më mirë për Kamzën, teksa të besuarit e trajnerit Eni Llazani patën një ritëm mjaft të mirë në fazën sulmuese në periodën e parë, duke fituar 25-17. Në minutat e para të periodës së dytë, vendësit prekin edhe avantazhin më të lartë në këtë takim, duke u shkëputur deri në +11 pikë (34-23). Por më pas durrsakët arrijnë që të reagojnë mjaft mirë. Skuadra e Melzin Lazimit e përmirëson lojën, për ta fituar periodën e dytë 20-22, ndërsa ekipet shkojnë në pushim me epërsinë 45-39 për Kamzën. Loja e bregdetarëve vjen në rritje edhe në periodën e tretë, me Teutën që triumfon 15-21, ndërsa pas 30 minutash shifrat e përgjithshme janë në baraspeshë të plotë 60-60. Çereku i fundit është tepër interesant, me të dyja ekipet që luftojnë fort në çdo aksion, por pa mundur që të krijojnë shkëputje. Në dy minutat e fundit, eksperienca, kualiteti dhe grupi më i kompletuar i Teutës bënë diferencën në parket. Amerikanët
Patterson dhe Sullivan realizuan koshat vendimtarë në çastet finale duke u dhënë suksesin me +5 pikë durrsakëve. Pesë lojtarë të Teutës arritën kuotë dyshifrore pikësh, ndërsa rendimentin më të lartë e kishte Patterson me 23. Për Kamzën më i miri ishte kapiteni Niko Thano, autor i 22 pikëve.
TIRANA-BESËLIDHJA – Bardheblutë konfirmojnë formën e shkëlqyer, duke e treguar forcën edhe përballë
kryesuesve të Besëlidhjes. Kryeqytetasit triumfuan me rezultatin 81-73 në sallën “Farie Hoti” në një takim ku ishin në avantazh thuajse gjatë të gjithë kohës. Sfida nisi me ritëm të ulët, teksa në minutat e para të dyja skuadrat gabojnë shumë. Por gradualisht ekipet e korrigjojnë shënjestrën, me periodën e parë që fitohet 21-16 nga bardheblutë. Edhe çereku i dytë flet për Tiranën, teksa kryeqytetasit luajnë më qartë, ndërsa
spikat Hysenagolli, i cili dominon në topat në tabelë si mbrojtje ashtu edhe në sulm. Nga ana tjetër Besëlidhja humbet shumë sulme duke tentuar me goditje për 3 pikë. Kështu, çereku i dytë mbyllet 23-15 për Tiranën, që kryeson 44-31 në përfundim të pjesës së parë. Por me rikthimin në parket, Besëlidhja nis ofensivën për të rikuperuar, ndërsa Tiranës i duhen gati 4 minuta për të gjetur koshin e parë. Kështu, miqtë e fitojnë periodën 10-22, duke ngushtuar në 54-53 pas tri periodash. Por në 10-minutëshin e fundit Tirana rimerr frenat e lojës. Spikat amerikani Davis, e cili i jep freski lojës së bardhebluve. Kështu Tirana fiton 27-20 në periodën e katërt, duke vulosur suksesin me +8 pikë avantazh. Njeriu i ndeshjes ishte pa diskutim Endrit Hysenagolli, i cili po zhvillon një sezon të shkëlqyer. 47 pikë, 18 ribaunde dhe 4 asiste për gjigantin e bardhebluve. Deciziv për skuadrën e Erkand Karajit rezultoi edhe afrimi i fundit në merkato, Gerard Davis. 16 pikë dhe 5 ribaunde për amerikanin, me bardheblutë që më në fund rigjejnë pikët edhe nga stoli. Ndeshje shumë e mirë edhe për Julian Hamatin, autor i 15 pikëve dhe 14 ribaundeve. Për Besëlidhjen rendimentin më të lartë e kishte i zakonshmi Jordan Robinson, me 23 pikë e 7 ribaunde. Kujtojmë se të hënën, Apolonia mundi Vllazninë 86-81, me shkodranë që bien matematikisht nga kategoria.
A.DUSHKU/N.GOCI