Revolucioni, në 2026-ën Do të kemi Botërorin më të gjatë të historisë
Do të ketë tri bileta më shumë edhe për Europën
FIFA zgjeron formatin me 48 ekipe, do të ketë 104 ndeshje
Kupa e Botës nuk do të jetë më si turneu që jemi mësuar të shohim deri tani. Nga viti 2026, kompeticioni më i rëndësishëm futbollistik i globit do të zgjerohet në 48 skuadra dhe tashmë është hedhur dritë edhe se si do të jetë faza në grupe e turneut, me një rritje të ndjeshme të kohëzgjatjes së tij dhe numrit të ndeshjeve që do të luhen. FIFA kishte planifikuar fillimisht që të luheshin grupe me tri skuadra pjesëmarrëse. Por duke parë se kështu rivaliteti i ndeshjeve të fundit mund të zhdukej, pasi rrezikonte kompromise që do të vinin në dyshim integritetin e futbollit, i është kthyer sistemit ekzistues duke transformuar fazën në grupe me nga 4 skuadra në secilin prej 12 grupeve.
104 NDESHJE - Sipas “The Athletic”, e cila zbuloi fillimisht lajmin ditën e djeshme, ndërsa ndryshimi u miratua më vonë nga këshilli i FIFA-S në Ruanda, e ka dërguar në 104 numrin e ndeshjeve të turneut, nga 64 që ishin në edicionin e fundit që u zhvillua në Katar. Faza me eliminim direkt do të ketë 32
skuadra pjesëmarrëse, pasi dy të parat e çdo grupi, si dhe 8 skuadrat e treta më të mira, do të vazhdonin rrugëtimin e tyre në fazën tjetër. Turneu, i cili në vitin 2026 do të zhvillohet në SHBA, Kanada dhe Meksikë, do të ketë një shtrirje kohore
disa ditë më të gjatë, pasi parashikohet të zgjasë 39 ditë, si asnjëherë më parë në histori (në Katar turneu zgjati 29 ditë). Ky ndryshim nuk i shkon për shtat klubeve që furnizojnë kombëtaret me lojtarë, pavarësisht se FIFA do ta shkurtojë periudhën
e grumbullimit në maksimumi 17 ditë nga 24 ditë që ishte në Botërorin e fundit. Por në vend të planit fillestar, aq shumë të kritikuar me 16 grupe me tri skuadra, që solli kundërshtime nga ekspertët për një pakt të mundshëm në ndeshjet e fundit, FIFA vendosi t’i qëndrojë planit me 4 ekipe për grup. Për herë të parë në historinë e një Botërori, fituesi do të luajë 8 ndeshje për të ngritur trofeun. Skema e kualifikueseve të Botërorit për ekipet europiane nuk është përcaktuar
ende nga UEFA, por teorikisht edhe shanset e Shqipërisë pritet të shtohen për një kualifikim të mundshëm në turneun e tri viteve më vonë, duke qenë se tashmë Europa nuk do të dërgojë më 13 kombëtare në Botëror, por 16. Ideja për ta zgjeruar numrin e ekipeve të Botërorit në 48 u hodh për herë të parë në vitin 2017 dhe u përball me kundërshtime të mëdha. Por dje, në këshillin e FIFA-S mbajtur në Kigali të Ruandës, presidenti Xhani Infantino dhe shefat vendimmarrës të qeverisë botërore të futbollit, miratuan planin e tyre.