Saki: Vetëm Napoli gati për Europën, Interi dhe Milani jo
“Pioli punon mirë, Inzagi inferior prej kolektivit”
Ish-trajneri skanon shanset e italianeve në Champions
Tri ekipe në çerekfi nalet e Championsit, Italisë i mungonin prej 17 vjetësh. Sipas Arrigo Sakit, momenti për të avancuar duket i duhuri pavarësisht se Interi dhe Milani, ndryshe nga Napoli, nuk e bindin. Çdo shpjegim deri në detaje nga ana e ish-trajnerit ofrohet në intervistën e mëposhtme.
A është e dukshme dora e Spaletit në procesin e zhvillimi të Napolit?
Do të thosha po, duke qenë se lojtarë të rëndësishëm si Mertens, Insinje dhe Kulibali u shitën në verë dhe të gjithë besonin se Napoli ishte dobësuar. Në vend të kësaj ndodhi e kundërta, sepse Spaleti fokusohet te loja, te motivimet e forta, te shpirti i ekipit.
Çfarë mendoni për Piolin dhe Milanin e tij?
Ishte një strateg sezonin e kaluar, kur fitoi një titull që askush nuk e imagjinonte të mundur. Pas triumfit ka hasur disa vështirësi edhe për shkak se cilësia e individëve që ka në ekip nuk është e madhe. Në Champions, megjithatë, ai bëri dy paraqitje të shkëlqyera kundër Totenhemit.
Atëherë, optimizëm për të ardhmen?
Po, sepse kuqezinjtë janë në rrugën e duhur dhe, sepse, Pioli ka mundur të rikthejë në drejtimin e duhur një situatë aspak të lehtë. Sigurisht, ndonjëherë ekipi duhet të jetë më kompakt, por mendoj se do të përmirësohet me kalimin
e kohës. Në Londër Milani tregoi personalitet të fortë.
Edhe Interi u kualifikuar pa pësuar gol ndaj Portos.
Po, por vuajti. Dhe jo pak. Si do të ishin gjykimet për zikaltrit sot nëse nuk do të kishte pritjet e Onanës dhe ato spastrime mbi vijën fatale?
Inzagi është një trajner i mirë, që mbështetet në taktika, dhe për rrjedhojë tek individët. Interi ka vlera individuale që janë dukshëm më të larta se ato të Napolit dhe Milanit, por vlera kolektive i bën ata inferiorë. Mendoj se mund të bëjë më shumë.
Sigurisht, megjithatë, Inzagi i studion kundërshtarët dhe gjen mënyrën për t’i mposhtur apo jo?
Pjesërisht po. Por unë do të doja që ai të ishte më i guximshëm, e sikur të mos vendoste gjithmonë një lojtar më shumë në mbrojtje, duke dobësuar
mesfushën dhe duke mos lejuar veprimin e presionit rival. Lojtarët i ka e fundja kush mund t’i lejojë vetes të ketë në stol lojtarë si Brozoviç apo Lukaku? Por tani nevojitet një lojë më sulmuese. Inzagi është i zoti, ndaj jam duke pritur për hovin e tij në cilësi.