Partizani e bën festë, “poker” ndaj Kastriotit
Shënojnë tre sulmuesit titullarë, gol fantastik i Matondos
Të kuqtë mposhtin me shifrat 4-1 krutanët, i marrin kreun Tiranës
Partizani kthehet te fi torja në kampionat dhe rimerr kreun pas barazimit të Tiranës. Të kuqtë mposhtën lehtësisht Kastriotin me shifrat 4-1 në stadiumin e kuq, pas një ndeshjeje të interpretuar shumë mirë nga ana e skuadrës së Kolelës. Cara, Matondo, Selmani dhe Mba shënuan për të kuqtë, ndërkohë që Mihana realizoi për krutanët, të cilët vijojnë “të zhytur” në vendin e fundit të renditjes.
PJESA E PARË – Ndeshja nis me Partizanin, që qarkullon topin dhe tenton të gjejë të çara, por Kastrioti është gjithashtu produktiv në disa dalje, duke mobilizuar mbrojtjen e kuqe. Rasti i parë për t’u shënuar i ndeshjes regjistrohet në minutën e 10të, kur Hasani tenton me një roveshatë, por topi rroket te Preka e më pas Rexhepi e grushton. Në minutën e 15-të Kastrioti rrezikon sërish, këtë herë me Mihanën, që gjuan befasisht nga rreth 17 metra, por Rexhepi i thotë sërish “jo”. Më pas gradualisht Partizani merr fushën në dorëzim. Pas disa sulmesh jo me rrezikshmërinë e duhur vjen edhe goli për të kuqtë. Rrapaj godet nga jashtë zonës pa shumë pretendime, por Sali nuk e kontrollon si duhet dhe thjesht devijon. Cara përfiton dhe tund rrjetën në portën e boshatisur. Goli i dytë nuk vonon. Në të 40-ën Rrapaj tenton me një “predhë” nga distanca dhe Sali devijon mbi traversë. Në zhvillimet e këndores shënohet goli i javës. Pasi topi del nga zona, shkon te Matondo, që nis një predhë të fuqishme dhe shkund rrjetën, duke realizuar një gol fantastik. Kur u duk se Partizani siguroi gjithçka, Kastrioti ngushtoi shifrat. Hadroj dhe Preka nuk arrijnë të bllokojnë Karakaçin, i cili zhbllokohet dhe shërben për Mihanën. Sulmuesi godet menjëherë portën dhe mposht Rexhepin, si dhe Sotën. Vetëm një minutë më vonë, Rrapaj ka një rast të artë, duke depërtuar shumë bukur mes kundërshtarëve, por Sali bën mrekullinë dhe pret goditjen e vlonjatit. Në minutën e dytë shtesë vjen edhe goli i qetësisë për të kuqtë. Cara bën gjithçka mirë nga e majta dhe kroson për Selmanin, që tund lehtësisht me kokë rrjetën pak centimetra nga porta.
PJESA E DYTË – Ky fraksion është ndjeshëm më i qetë. Kastrioti nuk ka forcën e duhur për të sulmuar, ndërsa Partizani menaxhon. Pas minutash të qeta nën “sundimin” e të kuqve, Partizani gjen edhe golin e katërt, me Mba, që bën gjithçka mirë. Nigeriani merr një vertikalizim nga Matondo, fiton duelin me kundërshtarin në mesfushë dhe finalizon si duhet një sprint duke fiksuar shifrat në 4-1. Pas golit të katërt edhe Kastrioti e ul ritmin, Partizani bën disa zëvendësime dhe të dyja skuadrat mendojnë në kursimin e energjive. Përtej disa përpjekjeve, nuk ka asgjë për të shënuar dhe Partizani fiton me “poker”, duke kapur Tiranën në krye të klasifikimit.