Kthehen ultrasit, fëmijët “çmendin” Remi Selmanin
“Panorama Sport” ju sjell pikantet e ndeshjes së djeshme mes Partizanit dhe Kastriotit në stadiumin e kuq, e fituar 4-1 nga vendësit. *Drejtori i përgjithshëm i klubit, Olsi Rama, u jep dorën të gjithë futbollistëve në momentin kur hyjnë në dhomat e zhveshjes për të bërë përgatitjet e fundit.
*Ndryshe nga ndeshja me Vllazninë në Kupë, “Ultras Guerrils” janë rikthyer dhe kanë mbështetur ekipin gjatë gjithë ndeshjes. Ata shpalosën banerin e tyre të zakonshëm.
*Vajzat e skuadrës së basketbollit të Partizanit, që u shpallën fituese të Ligës Unike, bashkë me trofeun, përshëndesin tifozët e pranishëm në stadium dhe marrin mbështetjen e tyre të ngrohtë. *Stojanoviç rrezikon të dëmtohet në minutën e dhjetë. Teksa mundohet të mbajë topin në lojë, ai përplaset me poltronën metalike të improvizuar për kamerat. Fatmirësisht pa pasoja për mbrojtësin. *Dhjetëra tifozë preferojnë të mos paguajnë një biletë dhe e shohin ndeshjen nga pas portës, në anën e parkingut. *Valentino Murataj mban për herë të parë shiritin e kapitenit të Partizanit, pasi në këtë ndeshje mungojnë Telushi dhe Hoxha. *Kolela urdhëron që Mensah të bëhet gati për lojë. Ganezi e merr nxehjen me qetësi dhe italiani bërtet nga pankina se nuk ka kohë dhe duhet të nxitojë.
*Mensah aktivizohet në vend të Selmanit. Viktor da Silva lë për një moment nxehjen dhe shkon të përqafojë dhe përgëzojë tetovarin pas golit të parë të shënuar.
*Sota largon një top aq fort, sa e shqelmon mbi tribunën kryesore dhe topi ngec në pjesën e mbulesës së stadiumit. Një nga punëtorët ngjitet lart dhe e rikthen në fushë.
*”Forca, dhe merri bluzën Levës”, dëgjohet t’i thotë Kolela, Hadrojt, i cili është grumbulluar nga Kombëtarja për ndeshjen ndaj Polonisë. *Dhjetëra tifozë të vegjël vërshojnë drejt Selmanit për t’i marrë fanellën në fund të ndeshjes. Sulmuesi mezi arrin t’u shpëtojë dhe futet me nxitim në autobus.