Dinamo feston në Vlorë, Flamurtari djeg shansin
Sherr dhe nëntë minuta ndërprerje, zhgënjejnë brazilianët
Një penallti vendosi kryendeshjen, blutë kthehen të dytët
Dinamo merr fitoren e vitit në Vlorë dhe ngjitet e dyta duke parakaluar Flamurtarin në renditje, ndërsa tashmë i afrohet me vetëm një pikë Skënderbeut kryesues. Kryendeshja e javës së 20-të në Kategorinë e Parë zgjati 99 minuta, pasi në fushë pati nga të gjitha. Sfida u vendos nga një penallti që u kontestua shumë në minutën e 83-të, e cila më pas solli edhe sherrin e pazakontë mes trajnerit Marcelo Troisi dhe zyrtarit të Dinamos, Ermal Barushi. Pas golit të brazilianit Denison nga pika e bardhë, pati 9 minuta ndërprerje të lojës dhe tre kartonë të kuq, por që ishin për zyrtarët e përfshirë në sherr dhe kapitenin e kuqezinjve, Andi Ribaj, i cili ishte në stol. Nga ky takim blutë e kryeqytetit dolën të fituar në shumë aspekte, në një kohë që vlonjatëve u interesonte edhe një barazim. Edhe pse në fushë çdo gjë ishte e ekuilibruar dhe skuadra e Marcelo Troisit mund të shënonte, në fund bëri diferencën cinizmi i dinamovitëve. Penalltia e dhënë nga arbitri kryesor, Kreshnik Cjapi, e çorientoi totalisht Flamurtarin dhe lojtarët nuk ditën të menaxhonin situatën.
PJESA E PARË - Flamurtari e nis me katërshen braziliane në vijën e parë: Indio Oliveira, Fernando, Flores dhe Xhonatan, ndërsa Dinamo përgjigjej me Ivan, Denison dhe Taulant Markun, ndërsa si digë përpara mbrojtjes ishin Daja dhe Lilaj, që u jepnin shumë eksperiencë bluve. Tenativa e parë drejt portës është në minutën e 7-të, kur Prodani me një goditje fluturimthi vendos në provë portierin Kuka. Flamurtari reagon më pas me një aksion të bukur të dyshes Flores-indio, me këtë të fundit që futet në zonë dhe godet nga një pozicion diagonal, por portieri italian i Dinamos, Krosta, eviton golin. Vlonjatët mundohen të shtyjnë drejt zonës blu, por nuk janë të qartë në finalizimin e aksioneve. Një “predhë” me të majtën e Indio Oliveirës krijon iluzionin e një supergoli, por topi kalon ngjitur me shtyllën. Skuadrat shkojnë në dhomat e zhveshjes me rrjeta të paprekura dhe blutë që nuk shfaqen të rrezikshëm në portën e Klajdi Kukës.
PJESA E DYTË – Pas pushimit trajnerët nuk bëjnë asnjë ndryshim. Loja është e
ekuilibruar, por me Dinamon që me kalimin e minutave kërkon të afrohet te zona vlonjate, duke sulmuar më tepër nga krahët i majtë, aty ku Allmuça dhe Prodani bëhen të rrezikshëm me daljet e tyre. Mehmeti hedh në fushë shtatlartin Perloshi, ndërsa edhe Troisi bën ndryshime. Rastet e pastra mungojnë në portat respektive, derisa mesfushori nga Gambia, Karamba, futet
në zonë dhe Qarri e pengon. Cjapi akordon penallti dhe nga pika e bardhë shënon Denison, duke kaluar në avantazh Dinamon. Troisi hedh në fushë edhe sulmuesin Pedro, ndërsa në nëntë minutat shtesë miqtë mbrohen mirë dhe i vetmi rast që krijon Flamurtari është me Liçajn, por që godet në mënyrë të gabuar. Kësisoj, gjithçka mbyllet me fitoren minimale të bluve.