“Vendos për pak orë...”, Longo joshet nga Flamurtari
“Menaxhim si në Serinë A, ngrohtësia e tifozëve me ka goditur”
Rrëfehet italiani, që ishte në Vlorë dhe takoi administratorin
Diego Longo joshet nga Flamurtari, e megjithatë ka kërkuar pak orë kohë për të vendosur. Italiani ishte në Vlorë të hënën, ku ndoqi nga afër ndeshjen e sezonit. Dhe kjo vizitë nuk ka qenë rastësore, por e planifikuar. Ai ishte ftuar nga vetë drejtuesit kuqezinj për të parë ambientin dhe diskutuar mundësinë e një bashkëpunimi. TAKIMI
Në një prononcim të dhënë ekskluzivisht për “Panorama Sport”, ish-tekniku i Kukësit tregon të vërtetën e takimit me Sinan Idrizin dhe përshtypjet që i lanë tifozët. Për të, do të ishte e bukur t’i jepte ndihmën për t’u rikthyer në elitë, duke dhënë edhe sinjalin e parë për një bashkëpunim midis palëve. “Isha mysafir i Flamurtarit në ndeshje dhe u kënaqa duke takuar njerëz
shumë të mirë dhe profesionistë si menaxheri dhe presidenti. Vetë publiku më goditi me ngrohtësinë e tij të jashtëzakonshme. Padyshim që Flamurtari ka një qytet, një menaxhim dhe tifozë të Serisë A dhe t’i ndihmosh ata të kthehen do të ishte diçka e bukur”, u shpreh fillimisht
italiani, të cilit i ka lënë mbresa të mira qyteti i Vlorës. VENDIMI
Në lidhje me mundësinë reale që të marrë në dorë “frenat” e pankinës vlonjate, trajneri la të nënkuptohej se e kishte marrë tanimë një ofertë nga Sinan Idrizi. E megjithatë, vendimin do ta
merrte pasi të konsultohej me familjen dhe ndihmësit e tij. “Unë jam duke shkuar në shtëpi për të diskutuar këtë mundësi me familjen dhe shoqëruesit dhe do të marr një vendim në orët e ardhshme”, u shpreh në prononcimin e tij të shkurtër, Diego Longo. Duket se trajnimi i tij
në Kukës sezonin e kaluar ka lënë mbresa të mira në vendin tonë, teksa më herët u lakua edhe për pankinën e Egnatias pak muaj më parë. Gjithsesi, mbetet për t’u parë nëse do të ketë një tjetër aventurë në vendin tonë, kësaj here në radhët e vlonjatëve në Kategorinë e Parë.