Zikaltrit, në qershor humbasin gjysmën e ekipit
Nëntë humbjet në 27 javët e para të kampionatit kanë rikthyer edhe një herë në vëmendje gjendjen e skuadrës së Inzagit, që ashtu si vetë ai, është vendosur e gjitha nën vëzhgim. Vazhdimësia e munguar dhe rendimenti në rënie janë pikëpyetjet e mëdha të një organike, që edhe pse është projektuar të jetë më e forta në Itali, nuk po ia del të konkurrojë si e tillë as me ekipet "inferiore". Por ndërkohë që lojtarët kanë zhgënjyer dhe nuk ia kanë dalë të kalojnë një sërë provimesh muajin e fundit, duket se shumë prej tyre nuk do të kalojnë as testin e rinovimit, me Interin që në qershor do të shikojë të paktën një formacion të plotë t'i largohet.
NË SHITJE - Të paktë janë ata që mund të sjellin të ardhura në arkat zikaltër, më saktë vetëm tre prej tyre, që duken tashmë me valixhe në duar. I pari është Denzel Dumfris, prej kohësh i piketuar për t'u sakrifikuar dhe për të sjellë rreth 40 milionë euro, edhe pse performancat e fundit të tij nuk ndihmojnë. I dyti është Marselo Brozoviç, i cili e ka humbur vendin e tij të titullarit dhe nuk përjashtohet që në verë të lërë Interin, ku shpreson të arkëtojë 320 milionë euro për të. 31 milionë euro zikaltrit shpenzuan dy vite më parë për Hoakin Korrean, i cili nuk ka përmbushur asnjë pritshmëri dhe largimi i tij duket i sigurt, me Interin që sigurisht do të duhet të ulë ndjeshëm çmimin e shitjes. SKADENCA E HUAZIME - Ka 6 lojtarë që janë në skadencë kontrate dhe drejtuesit kanë bërë përpjekje për rinovimin vetëm për De Vrajin dhe Xhekon, me të dy ama që vështirë se do ta gjejnë gjuhën e përbashkët, duke parë si po shkon fundi i sezonit. Pas tyre D'ambrozio, Galjardini, Handanoviç e Shkriniar, të cilët pritet të shoqërohen në largimin e tyre edhe nga të huazuarit Lukaku e Belanova, që e shikojnë të vështirë qëndrimin për shkak të performancave të tyre. Tek Interi e dinë që nuk do të jetë e lehtë të zëvendësojnë një formacion të plotë, duke marrë parasysh edhe kushtet e tyre financiare, motiv për të cilin synohen parametrat zero. Gjithsesi, fakti që ndaj Juves plot 8 lojtarë të aktivizuar ishin mbi 30 vjeç është një arsye e mjaftueshme që në Milano të synohet revolucioni.