Hakerët sulmojnë Ferrarin, vidhen të dhëna klientësh
Reagon kompania: Nuk biem pre e shantazheve nga krimi
AUTOMOBILIZËM/ Incident i sigurisë informatike në Maranelo
Incident i sigurisë in formatike për Ferrarin. Kompania italiane njoftoi mbrëmjen e së hënës më 20 mars se kishte pësuar vjedhjen e disa të dhënave të kontaktit të klientëve të saj (të cilët u informuan menjëherë për incidentin). Kompania nga Maranelo bën të ditur se ka marrë një kërkesë për të paguar në mënyrë që t’i rikuperonte të dhënat e vjedhura, por se e kanë refuzuar menjëherë diçka të tillë. Ferrari ka nisur një hetim për incidentin në bashkëpunim me një kompani lider në botë të sigurisë kibernetike, si dhe ka informuar autoritetet përkatëse. Më poshtë ju pasqyrojmë njoftimin e plotë për shtyp të Ferrarit lidhur me incidentin kibernetik që ka pësuar kompania italiane.
KOMUNIKATA E FERRARIT - “Ferrari NV njofton se Ferrari S.P.A., një kompani italiane në pronësi të plotë të saj, ka marrë së fundmi një kërkesë për blerje në lidhje me disa nga detajet e kontaktit të klientëve të saj. Me marrjen e kësaj kërkese, ne filluam menjëherë një hetim në bashkëpunim me një kompani lider në botë për sigurinë kibernetike. Gjithashtu, ne kemi informuar autoritetet përkatëse dhe kemi besim se do të bëjnë gjithçka për të kryer hetimin në lidhje më këtë çështje. Në përputhje me politikën e saj të korporatës, Ferrari nuk do të pranojë asnjë kërkesë për shpërblim, pasi pranimi i kërkesave të tilla do të financonte aktivitetin kriminal dhe do të lejonte aktorët e kërcënimit të përsërisin sulmet e tyre. Me besimin se mënyra më e mirë e veprimit është të informojmë klientët tanë, ne i kemi njoftuar klientët tanë për ekspozimin e mundshëm të të dhënave të tyre dhe natyrën e ngjarjes. Ferrari e trajton çështjen e konfidencialitetit të klientëve të saj shumë seriozisht dhe e kupton rëndësinë e asaj që ndodhi. Ne kemi bashkëpunuar me ekspertë për të forcuar më tej sistemet tona dhe kemi besim se ato janë solide. Ne gjithashtu mund të konfirmojmë se shkelja nuk kishte asnjë ndikim në operacionet tona të biznesit”, shkruhet në deklaratën e bërë nga kompania gjigante italiane e automobilizmit.