Dibra: Në Burrel, për të mbajtur gjallë shpresat
BESËLIDHJA/ Kapiteni nuk heq dorë nga mbijetesa dhe bën llogari: Kemi dy ndeshje në shtëpi
Në Lezhë nuk kanë në plan që të dorëzohen. Edhe pse janë ngujuar prej javësh në fund të renditjes, besojnë akoma te mbijetesa. Qëllimi është që minimalisht të shmangin rënien direkte dhe matematika ua lejon që të besojnë, kur në total kanë mbetur edhe 18 pikë në lojë. Skuadra ka arkivuar atë barazim pa gola me Skënderbeun dhe ka nisur përgatitjet. Ndalesa e garës u vjen për shtat, pasi kanë mundësi që të korrigjojnë gabimet dhe të gjejnë qetësinë për të përballuar fundin e këtij kampionati. Kalendari u rezervon edhe 6 ndeshje, konkretisht me Burrelin, Tomorin, Luzin, Apoloninë, Flamurtarin dhe Korabin. Vëmendja është përqendruar te transferta matjane, prej së cilës presin kthesën. Kanë që prej 5 shkurtit që nuk e fitojnë një ndeshje dhe situata është si mos më keq, e megjithatë luftën do ta vazhdojnë. Këtë e thotë edhe kapiteni Kledi Dibra, në një deklaratë të dhënë enkas për “Panorama Sport”. Mbrojtësi evidenton se në “Liri Ballabani” është e fundit mundësi që kanë për të mbajtur gjallë shpresat. “I jemi afruar shumë vijës fatale dhe rënia nga kategoria është kaq pranë. Shansi i fundit për të mbajtur shpresat gjallë është Burreli, ndeshje që do ta luajmë në transfertë. Nëse ia dalim në ‘Liri Ballabani’ gjithçka do të përmbyset në favorin tonë. Pse e them këtë? Mjafton të shohësh kalendarin dhe e kupton, direkt ne kemi dy ndeshje radhazi në shtëpi. Presim Tomorin dhe Luzin dhe në Lezhë llogaritë duhen bërë ndryshe. Edhe pse Burreli momentalisht renditet në zonën e sigurisë, diferenca e pikëve e penalizon. Një humbje e mundshme përballë nesh, i zhyt edhe ata në krizë. Me këtë dua të them që do të jetë e vështirë dhe parashikohet një finale. Ne po punojmë intensivisht për ta kaluar këtë 90-minutësh përballë matjanëve. Shpresoj shumë se edhe pushimi i kësaj fundjave do të na ndihmojë për të rikuperuar energjitë, po ashtu edhe dëmtimet që kemi pasur. Besëlidhja nuk e meriton këtë gjendje, por ky është realiteti. Sidoqoftë, ne do të luftojmë fort për ta ndryshuar. Shpresoj shumë tek ekipi”, përfundoi shkodrani i skuadrës lezhjane. PRENG GJIKOLA
22 MARS
TIRANA – STUDENTI PARTIZANI – VLLAZNIA FLAMURTARI – BARLETI (ELBASANI 78-51 81-66 120-60 PUSHIM)