Alinani: Goli ishte fantastik, na u hap rruga për vendin e 4-t

TOMORI/ Mesfushori kërkon parakalimin e Korabit

Fitorja e fundit me Burrelin ka rritur dukshëm moralin te lojtarët dhe stafi teknik. Në Berat janë futur bindshëm në zonën “play off”, por tani ia kanë vënë syrin vendit të 4-t. Klaus Alinani nuk e quan ëndërr këtë pozicion dhe këtë e thotë për “Panorama Sport”. Anësori tregon edhe emocionohet e golit, meritat e të cilit i shpërndan. “E kishim vlerësuar Burrelin maksimalisht. E dinim që është një ekip cilësor dhe do të bënte qëndresë të fortë në Berat. Parashikimet tona dolën të sakta. Kështu që, fitorja nuk ishte e rastësishme. Jemi shpërblyer për aq sa dhamë në fushë, ndonëse na duhet të pranojmë se kemi shpërdoruar shumë raste të pastra. Përtej analizës së ndeshjes, festa që pasoi në përfundim ka qenë e ligjshme, jo vetëm për lojën që zhvilluam, grintën dhe shpirtin e garës, por edhe se tani na është hapur plotësisht rruga drejt vendit të katërt.

Kalendari i favorshëm, por edhe kombinacionet e rezultateve të skuadrave rivale, na e japin këtë mundësi dhe ne do të japim gjithçka për të arritur këtë objektiv. Trajneri bazohet te forca e grupit, ndërsa ne si skuadër e mbështesim plotësisht. Jemi të ndërgjegjshëm se e meritojmë vendin e katërt. Sa i përket golit të fitores, mund të them se nuk ishte vetëm meritë imja, pasi erdhi si rezultat i kontributit të të gjithë ekipit. Aksioni ka qenë fantastik, në kombinacionin me Çaços dhe Laval. Unë personalisht e kam shijuar shumë golin tim të tretë në këtë kampionat, ku dy herë kisha shënuar si zëvendësues”, përfundoi Alinani. EDI SPAHIU