Kampioni i botës Mezut Ozil var zyrtarisht “këpucët në gozhdë”
“Magjistari” i jep fund futbollit të luajtur mes dritëhijesh
“Klas, elegancë, asistues, gola spektakolarë, përulësi, humanizëm”, janë disa nga termat që identifikojnë karrierën e shkëlqyer të Mesut Ozil brenda dhe jashtë fushës së blertë. Në një mesazh në rrjetin social “Twitter”, 34-vjeçari ka njoftuar se e ka marrë vendimin e vështirë të tërheqës nga futbolli. MESAZHI I OZIL-”PAS shqyrtimit të mirë, po njoftoj tërheqjen time të menjëhershme nga futbolli. Kam pasur privilegjin të jem një lojtar profesionist për gati 17 vjet dhe ndihem jashtëzakonisht mirënjohës rreth mundësive. Megjithatë, muajt dhe javët e fundit u bënë tepër të vështira si pasojë e dëmtimeve të njëpasnjëshme dhe më bënë të kuptoj se ka ardhur momenti i duhur të largohem nga skena e madhe e këtij sporti kaq të dashur. Ka qenë udhëtim mahnitës, i mbushur me përjetime gazmore dhe emocione të papërshkrueshme. Një falënderim i madh për klubet ku unë kam performuar si Shalke, Verder Bremen, Real Madrid, Arsenal, Fenerbahçe dhe së fundmi Istanbul Basaksehir. Gjithashtu trajnerët më të cilët kam punuar dhe mësuar, jo vetëm në planin taktik. Ky rrugëtim më ka prezantuar me shumë miq të mirë, me mbështetje të pakushtëzuar. Falënderim i veçantë i shkon familjes sime dhe rrethit të ngushtë shoqëror. Bashkëjetesa me ta m’i ka bërë më të lehta
sfidat dhe vështirësitë, të mbështjella me dashuri dhe pozitivitet, ndonëse disa etapa mund të kishin tablo të zymta. Nuk mund të harroj tifozëritë që më kanë mbështetur në ditë me diell e shi, një faleminderit është pak. Po pres me padurim të kaloj kohën e lirë me partneren Amine e dy vajzat e shtrenjta, Eda dhe Ela. Ju siguroj
se do të jem aktiv në rrjetet sociale më shpesh për të pasur interaktivitet me ju. Përshëndetje të përzemërta nga Ozil, shihemi së shpejti”, përfundonte mesazhin Mesut mes frazash të ndjera. Vlen të përmendet se 34vjeçari ka dhënë kontribut të pakursyer në ndihma humanitare ndaj shtresave në nevojë.