Laval: Kemi ekip fantastik, prisni surpriza në “play off”
TOMORI/ Shënoi gol, por afrikani “qan” dy rastet e shpërdoruara
Tomori realizoi objektivin fillestar, siguroi zonën “play off” dhe mund të ëndërrojnë ngjitjen. E megjithatë, llogaritë nuk i kanë mbyllur ende. Kanë edhe një tjetër mision, të blindojnë vendin e katërt. Dhe që të mbajnë këtë pozicion (i cili i lejon ta luajnë ndeshjen e parë të “play off”-it në shtëpi dhe, mbi të gjitha, të kalojnë më tej edhe me një barazim), duhet të marrin edhe një tjetër fitore. Javën e fundit shkojnë në Cërrik, atje ku i pret Turbina, e rënë tashmë në Kategorinë e Dytë. Fitorja përballë Korabit dha një “mal” me mesazhe. Skuadra bindi në lojë e rezultat, duke u treguar rivalëve se kanë edhe ata të drejtë që të ëndërrojnë elitën. Rrugë padyshim e gjatë dhe e vështirë, por jo e pamundur për t’u përshkuar. Një nga protagonistët e fitores së fundit ishte Vahab Laval dhe jo vetëm për golin e shënuar, por edhe paraqitjen mbresëlënëse. Gjatë një deklarate të dhënë për “Panorama Sport”, sidoqoftë, afrikani evidenton edhe disa pengje. “Ishte një superndeshje kjo me Korabin. Jo vetëm unë, por të gjithë, dhamë maksimumin. Jam i lumtur që shënova, por jo edhe aq për dy raste të arta që shpërdorova në secilën pjesë.
Megjithatë, rëndësi kanë pikët e plota. Kemi një ekip fantastik. Ishim në ditën tonë më të mirë. Kjo fitore në fushën tonë na mungonte shumë. Dua të falënderoj tifozët, që më mbështesnin. Më kanë emocionuar shumë me atë shfaqje që treguan në momentin e zëvendësimit. Duartrokitjet e fuqishme dhe ngritja e tyre në këmbë, vlejnë shumë. U përulem. Tani që jemi rikthyer në formën tonë më të mirë, jam i sigurt se ecuria jonë në këto nivele do të rezervojë surpriza në fazën e ndeshjeve kualifikuese për t’u ngjitur në elitë”, përfundoi Laval. EDI SPAHIU