“Më thërrisnin Sheva, tani i mund”
“Milanin e njohim mirë, por ne jemi të fortë dhe duhet vetëm të bëjmë Interin”
Edin Xheko analizon përballjen dhe karikon skuadrën: Nuk do të ndalemi këtu
Edin Xheko ka jetuar shumë derbe në kar rierën e tij të gjatë, por për të pa dyshim që ai i Milanos është ndër më të veçantit, e sidomos kur mbërrin në gjysmëfinalen e Champions-it. Sulmuesi pritet ta nisë titullar nesër ndaj kuqezinjve dhe për mikrofonat e UEFA-S ka bërë një panoramë të momentit të tij dhe të skuadrës, duke zbuluar edhe Shevçenkon si një nga idhujt e tij, ndoshta një nga rivalët më “të urryer” të tifozëve zikaltër.
MOMENTI - “Si ndihem? Ndihem i qetë. Do të jenë dy ndeshje spektakolare. Italia dhe qyteti i Milanos në veçanti duhet të jenë krenarë për këtë sfidë dhe faktin që dy klube të këtij qyteti do të luajnë në gjysmëfinalen e Ligës së Kampioneve. Çmimi në tryezë është i madh, të luash finalen në Stamboll do të ishte e pabesueshme. Ndoshta në Mançester nuk e kam ndierë aq shumë sa e ndiej këtu në Itali derbin. Nuk ka asnjë favorit në këto ndeshje dhe nuk ka rëndësi nëse një skuadër është me fortë apo më e dobët, pasi të gjithë japin gjithçka në ndeshje të tilla. Këtë do të shohim edhe në këto dy ndeshje”.
IDHULLI – “Kur kisha nisur të luaja në Bosnjë doja të përmirësohesha dhe qëndroja pas stërvitjes për ta arritur këtë. Një nga trajnerët e mi më quajti Andrij Shevçenko, sepse isha biond si ai dhe kisha disa lëvizje që e kujtonin. Nga atje, pak nga pak fillova ta shikoja. Më kujtohet tripleta që shënoi në Barcelonë, që atëherë ai u bë sulmuesi im i preferuar”.
KALENDARI - “Ne do të kemi shumë ndeshje në një kohë shumë të shkurtër. Vetëm në maj, mendoj se kemi tetë ndeshje në kalendar, njëra më e bukur se tjetra. Luajmë dy herë kundër Milanit, pastaj kemi finalen e Kupës ndaj Fiorentinës, e pastaj luajmë kundër Napolit e Atalantës. Gjithsesi kemi ekipin e duhur për të fituar dhe të kem kaq shumë objektiva në moshën 37vjeçare është një emocion i fortë”.
INTERI, I VEÇANTË - “Ky është viti im i dytë tek Interi dhe ne kemi fituar tashmë tre trofe. E vetmja keqardhje është që vitin e kaluar nuk e kemi fituar kampionatin ende. Gjithsesi jemi në gjysmëfinale të Ligës së Kampioneve, që mungonte për një kohë të gjatë. Këto dy sezone sigurisht që kanë qenë pozitive dhe unë jam shumë i lumtur që jam këtu. Ne kemi
qëndruar gjithmonë të bashkuar, edhe në kohët e këqija, por sidomos në momentet e mira kur kemi mundur të festojmë, të fitojmë ndeshje. Në këtë pikë të sezonit mendojmë vetëm për atë që mund të arrijmë deri në fund të sezonit”.
DERBI – “Interi duhet të bëjë Interin për të fituar, veçanërisht në Champions League. Arritëm në gjysmëfinale duke mundur ekipe të forta, jashtë parashikimeve. Kemi qëndruar të fokusuar ndeshje pas ndeshjeje, kemi arritur deri këtu dhe nuk kemi
ndër mend të ndalemi këtu. Milani është një skuadër e fortë, që po ashtu ka fituar të drejtën për të qenë në gjysmëfinale. Shoh dy ndeshje plot emocione, ku të dyja skuadrat do të japin gjithçka për të arritur në finale. Ne e njohim Milanin dhe ata na njohin ne,
ndaj nuk do të habitemi dhe as ata. Jemi të fortë dhe i kemi të gjitha cilësitë për të fituar, por duhet të bëjmë më të mirën. “San Siro” është gjithmonë spektakolar. Besoj se do të na japë forcë për të arritur në finale, veçanërisht në ndeshjen e dytë”.