Nga Infantino tek Abodi, racizmi ndaj Vlahoviçit çështje shtetërore
Racizmi është një kancer i frikshëm në Serinë A që nuk resht së përsërituri. Dhe të mendosh që nuk kishte kaluar as një muaj nga ajo që i ndodhi Romelu Lukakut në Torino, në Kupën e Italisë përballë “zonjës së vjetër”, ndërkohë që të dielën viktima ishte pikërisht Juventusi, më konkretisht Dushan Vlahoviç. Madje, më shumë sesa koret e ultrasve zikaltër, ato që bënë shumë përshtypje ishin fjalët e trajnerit të bergamaskëve, Xhanpiero Gasperini, i cili koret “cigan m...” nuk i quajti aspak racizëm, por thjesht mungesë edukate dhe ofendime normale në drejtim të një kundërshtari.
REAGON MINISTRI – Dhe kaq mjaftoi që kjo të shndërrohej menjëherë në një çështje edhe shtetërore, duke qenë se solli reagimin pikësëpari të ministrit të ri të sporteve në Itali, Andrea Abodi, i cili iu drejtua edhe drejtpërdrejtë trajneri të Atalantës, Gasperini: “Çdokush përgjigjet sipas ndërgjegjes së tij, por unë shpresoj që Gasperini të ketë reflektuar mbi fjalët e tij, pasi është absurde që ai të quajë mungesë edukate atë shfaqje të qartë racizmi. Unë mendoj se ky është një fenomen që nuk duhet të nënvlerësohet, pas të bëjmë karikatura të kota me deklarata për të mbrojtur tifozërinë e skuadrës së tij. Dhe për më shumë, trajnerët dhe drejtuesit e klubit duhet të jenë të parët që të dënojnë aktin”, u shpreh ministri Abodi.
EDHE BASHKIAKU – Pas qeverisë reagoi edhe kryebashkiaku i Bergamos, Xhorxho Gori, i cili gjithashtu i dha një shuplakë Gasperinit: “Koret kundër Stankoviçit te Roma, kundër Lukakut në Torino dhe ato ndaj Vlahoviçit në Milano e Bergamos së fundi nuk janë ofendime normale, por racizëm i pastër dhe ka ardhur koha që ta presim me thikë këtë gjë. Unë nuk e pranoj që të shoh tifozët e skuadrës sime që të bëjnë figura të tilla të shëmtuara. As nga Gasperini. Bergamo është tjetër gjë dhe meriton tjetër gjë”, tha Gori.
INFANTINO KËRCËNON – ndërkohë, ehe presidentin i FIFAS, Xhani Infantino, duket se ka dhënë një urdhër konkret nga larg, për Federatën Italiane të Futbollit: “Ka ardhur koha që ta dënojmë edhe më ashpër seç duhet këtë fenomen. Prandaj, pres dhe shpresoj në një dënim më shumë se shembullor për këtë akt racist të radhës”.