Dalipi: Na dërrmuan transfertat, gati për ndeshjen shtesë
“Po i qajmë pikët e lëna jashtë, por do të shpëtojmë”
LUSHNJA/ Trajneri ndan mendjen për “play out”-in
Lushnja po i bën llog aritë për më të keqen. Edhe pse e kanë akoma një shans të vogël matematikor për ta shpëtuar sezonin, po përgatiten për “play out”-in... Veç “malores” që e pret Skënderbeun, janë të varur prej ndeshjes Besa-burreli. Duke mos pasur asgjë në dorë vetë, kanë pranuar në një lloj forme verdiktin. Për t’i paraprirë ndonjë kombinimi që mund t’i favorizojë në javën e fundit, do të luajnë gjithçka për gjithçka përballë korçarëve. I presin në “Roza Haxhiu” dhe synimi është i qartë: fitorja. Këtë e thotë qartazi edhe Klevis Dalipi, gjatë një deklarate për “Panorama Sport”. Trajneri, në një lloj forme është dorëzuar për mbijetesën direkt, pasi qartazi e thotë që duhet të përgatiten për ndeshjen shtesë. Por kjo nuk e pengon që të kërkojë prej të tijve që të mbledhin forcat dhe bëjnë detyrën në javën e 26-të. Një rezultat pozitiv përballë bardhekuqve, do t’i karikonte edhe për ndeshjen shtesë. “Ne duhet të punojmë me seriozitet në çdo seancë. Ditë kemi boll në dispozicion, ndaj nuk kemi pse të ankohemi. Të tjerët mbase e kanë realizuar objektivin dhe janë me pushime, por ne nuk e kemi këtë luks. Dihet në çfarë situate jemi. Është ky shkaku që u bëj thirrje djemve që të jenë të përkushtuar. Do të stërvitemi edhe të dielën, sepse jemi në proces. Do të ndeshemi këtë mesjavë me Skënderbeun dhe pastaj do të luajmë ndeshjen shtesë. Duhet të përgatitemi më së miri taktikisht dhe mendërisht. Për ne nuk ka mbaruar misioni. Madje, tani është momenti më i vështirë. Bëhet fjalë për ‘play out’... Çdo ditë, stërvitje, vigjilencë, përkushtim maksimal, seriozitet dhe kjo deri në fund kur t’ia dalim”, u shpreh fillimisht elbasanasi.
GABIMET - Lushnja mbeti në zonën e “play out”-it si pasojë e humbjes 2-4 në Orikum. Verdhejeshilët kanë golavarazhin më të dobët dhe e kanë mbledhur mendjen te ndeshja shtesë. Teksa analizon gabimet e bëra, 47-vjeçari evidenton transfertat. Asnjë fitore jashtë fushe për një sezon të tërë (kanë vetëm atë në tavolinë me Tërbunin), dërrmuan lushnjarët. “Mendoj që duhet të bënim më mirë në transferta. Mungesa e përqendrimit na kushtoi shumë, aq më tepër në minutat shtesë kundër Besëlidhjes dhe Turbinës. Kemi qenë pranë fitores edhe në Burrel
ku duhet të shfrytëzonim superioritetin numerik për 20 minuta. Këto pikë të lëna po i qajmë sot. Kjo e fundit në Orikum më ka mërzitur shumë. U kisha thënë të mive, që kemi një transfertë të vështirë, pavarësisht rrethanave. Unë në 4 muaj në Lushnjë, asnjëherë nuk e kam kaluar ngarkesën e rezultateve negative te futbollistët. Por kam mbajtur përgjegjësi për t’i lënë të qetë ata. Pavarësisht humbjes në Orikum, drejtuesit si dhe tifozët janë në dispozicion të skuadrës. Nuk na mungon asgjë. Duhet ta shpërblejmë mbështetjen që ne marrim”, përfundoi Dalipi.