Tirana në finale, vendos sfida e parë
Tirana është finalistja e dytë e Kupës së Sh qipërisë dhe në 1 qershor do të luajë me Egnatian për trofeun e radhës në Shqipëri. Tirana është kualifikuar për herë të 27-të në finalen e Kupës së Shqipërisë, duke kaluar Teutën në gjysmëfinalet e turneut. Fitorja 3-0 në sfidën e parë ia bëri më të thjeshtë skuadrës së Shehit kualifikimin, pasi në Durrës dje e administroi mirë rezultatin e për më tepër u tregua më kërkuese në pjesën e parë, por sfida u mbyll pa gola. Në të dytën, të dyja skuadrat duket u pajtuan me fatin e sfidës dhe nisën të mendonin për kampionatin me zëvendësimet, duke zbehur vijimin e sfidës deri në vërshëllimën përfundimtare që dekretoi kalimin e bardhebluve në ndeshjen për trofeun. Tani do të jetë përballja me Egnatian në finalen e madhe që mund të sjellë një trofe tjetër te bardheblutë.
NDESHJA - Për sa i përket takimit, 90 minutat nuk prodhuan asgjë, edhe pse Tirana luajti me më të mirët. Loja nisi me një rast në minutën e gjashtë, me një mundësi të mirë për Tiranën me anë të një krosimi në zonë aty ku me kokë godet Aleksi, por çon topin në duart e Qirkos. Në minutën e 18-të, top në thellësi për Hasanin, i cili fiton duelin me Kotobellin. Ky i fundit e hedh në tokë sulmuesin dhe gjyqtari Cjapi jep goditje dënimi për bardheblutë e të verdhë për mbrojtësin e Teutës. Protestojnë të dyja palët, me vendësit që kërkojnë pozicion jashtë loje, e bardheblutë një të kuq, por Cjapi i qëndron vendimit të tij. Katër minuta më vonë, goditje dënimi ballore e Kallakut, topi përfundon në duart e Bekajt, i cili pret në pozicion. Në të 28ën, Berisha merr një pasim nga e djathta dhe gjuan duke kërkuar shtyllën e dytë, por gjen përgjigjen e Qirkos. Përsëri Qirko shpëton vendësit me një devijim ndaj gjuajtjes së Hasanit në hyrje të zonës. Me këtë rast mbyllet pjesa e parë. Pjesa e dytë ka në dominim Tiranën. Në minutën e 47-të, përsëri e rrezikshme Tirana me një gjuajtje të Haxhiut nga e majta që përfundon mbi traversë. Loja futet në një fazë pa shumë raste, ndërsa skuadrat vazhdojnë zëvendësimet njëra pas tjetrës. Për të parë shanse për gol duhet të zbresim në minutën e 71-të, Hasani nga e djathta
pason për Berishën, i cili gjuan në qendër të zonës, por sfera fluturon mbi traversë. Në të 86-ën, Kallaku tenton me një gjuajtje të fortë nga jashtë zonës, sfera kalon mbi traversë. Në minutën e parë shtesë, Berisha nga e majta tenton të gjejë portën me një
gjuajtje me harkim, por sfera devijohet jashtë në këndore. Ky ishte rasti i fundit i takimit që mbyllet 0-0 dhe vulos kualifikimin e Tiranës në finalen e Kupës së Shqipërisë. Vendosi takimi i parë i fituar nga bardheblutë në Elbasan 3-0 ndaj Teutës.