Labëria është cinike, një gol i Muçajt eliminon Butrintin
Vlonjatët marrin premio, Laluci: Të kalojmë edhe Pogradecin
Labëria mposht Butrintin në “play off” dhe vijon rrugëtimin për të tentuar ngjitjen në Kategorinë e Parë. Heroi i takimit ishte Ledion Muçaj. Vlonjatët festuan jo vetëm fitoren, por “ngrohën” edhe xhepat. Pas kualifikimit drejtuesit shpërndanë një milion e gjysmë lekë premio. Ndeshja ishte e tensionuar, ndërsa Agolli nuk kurseu as kartonët, plotë 11 të verdhë dhe 1 të kuq.
NDESHJA - Labëria e nis lojën në sulm, por Llojaj vetëm për vetëm me Andersonin nuk tregohet i saktë. Labët kërkojnë me çdo kusht që të zhbllokojnë dhe në të 13-ën ia dalin. Llojaj shërben për Miranin në zonë që prek shtyllën dhe kthehet në këmbët e Muçajt, i cili nuk e dal këtë mundësi. Pas 10 minutash është Qejvani që brenda zonës ka një mundësi të artë, por bën detyrën Anderson. Labët janë më kërkues, ndërsa sarandjotët duken të çoroditur. Mirani dhe sërish Qejvani bëhen protagonistë në vijim, por nuk kanë shënjestrën e duhur. Pjesa e parë do të mbyllej me avantazhin e vendësve. Në pjesën e dytë, Labëria do të shihej më kërkuese. Në minutën e 56-të, Mirani ka një rast të pastër, përballë Andersonit, por topi devijohet jashtë. Provon edhe Qejvani nga distanca, por pa rezultat. Butrinti luan ashpër me brazilianin Kamilo që shpesh shtynte kundërshtarët, duke ndezur gjakrat, aq sa për ofendime nga stoli Aliaj doli me të kuq. Kapo, i sapofutur në lojë, kishte një rast ideal, por pa sukses. Në minutat shtesë do të shpërdoronte edhe Çapoj. LALUCI - Pas ndeshjes, për “Panorama Sport”, drejtori i klubit, Vangjel Laluci, tha: “Të kënaqur nga kjo fitore. Ishte një ndeshje e vështirë, por dominuam krejt takimin. Tani na mbetet për të parë ndeshjen e radhës me Pogradecin. Nëse do ta kalojmë, do të mendojmë pastaj për ngjitjen. Na duhet t’i marrim takimet me radhë dhe të motivuar si në këtë ndeshje të parë”. ERMAL SIKA