Pogradeci likuidon Devollin
Tension dhe të kuq, bilishtarët rezistuan gati një pjesë në “Gjorgji Kyçyku”
Liqenorët fitojnë 3-1 dhe kalojnë në fazën tjetër të “play off”-it
Pogradeci likuidon Devollin. I shënon tre gola dhe shkon në fazën tjetër të “play off”-it. Kundërshtari i radhës që duhet të kalojë për të ëndërruar ngjitjen, është Labëria. Një penallti e Shytit dhe golat e Henrikes e Shkullakut kanë mjaftuar për të dalë fitimtarë në derbin e juglindjes.
NDESHJA - Në “Gjorgji Kyçyku” ndeshja nisi me miqtë në sulm. As dy minuta dhe një topi i humbur i Shkulaku në mesfushë, për pak sa nuk solli golin. D.kame shmang dy qendërmbrojtës dhe godet fort me të majtën, por Baçi largon rrezikun në këndore. Liqenorët sa i “ndezi” ky rast dhe shtojnë sulmet. Ivani ka tri mundësi të mira, por goli nuk duket. Sulmuesi bëhet protagonist edhe në momentin e tensionit, pas një të verdhi që mori. Pati shtyrje mes lojtarëve në fushë, por qetësia u vendos nga forcat e policisë dhe stafet përkatëse. Loja është e ashpër dhe faullet nuk kanë të sosur. Në të 34-ën e pëson
Çuko. Ndërhyn pas Çirkoviç dhe kjo i kushton të kuqin. Edhe pse me 10 lojtarë, Devolli mundohet të rezistojë. Por kjo zgjat derisa nuk jepet ajo penallti në të 40-ën, kur Lamellari ndërhyn ndaj Këndezit. Nga pika e bardhë gjuan Shyti dhe nuk e fal. Kjo pjesë nuk do të mbyllej këtu,
pasi në shtesë vjen goli i sigurisë. Berberi vjen me sprint nga e djathta dhe shërben për Henrikën, që brenda zonës është i pagabueshëm. Në shifrat 2-0 Pogradeci shkon më i qetë në pushim. Vetëm tre minuta nga fillimi i fraksionit të dytë, Berberi i jep një asist perfekt Shkulakut,
që i vetëm përballë portierit godet me të majtën dhe shënon për 3-0. Për Devollin do të kishte edhe një gol me penallti në të 60-ën, që e fiton D.kame dhe e çon në rrjetë Nallbati. Por vlejti vetëm për statistikë, pasi liqenorët menaxhuan më së miri fitoren deri në finish.