Garë e fortë për Finalet, reagojnë Uorriors e Niks
Brunson udhëheq Nju Jorkun në gjysmëfinalen kundër Majemit
NBA/ Seria ngushtohet 2-3, Kërri fantastik ndaj Lejkërsave
Në NBA janë luajtur dy ndeshjet e radhës gjysmëfinale të “play off”-it të konferencave. Golden Stejt dhe Nju Jorku kanë arritur të reagojnë në ndeshjet e pesta, për ta ngushtuar serinë në 23 respektivisht kundër Lejkërsave dhe Majemit. Tashmë për të përcaktuar kualifikimin do të duhen minimalisht ndeshjet e gjashta.
UORRIORS-LEJKËRS 121-106 (2-3) – “Warriors” luftojnë, fitojnë dhe mbajnë gjallë shpresat e finales në sfidën kundër Lejkërsave. Kështu mund ta përkufizojmë shkurtimisht paraqitjen e Golden Stejt, që zhvilloi një ndeshje mjaft të mirë ndaj skuadrës nga Los Anxhelosit, për ta ngushtuar serinë 2-3. Djemtë e trajnerit Kerr nisin fuqishëm, mbyllen përpara në çerekun e parë dhe arrijnë në +11 në gjysmën e sfidës, duke shkuar në pushim me avantazhin 7059. Në pjesën e dytë vendësve u mjaftoi vetëm të kontrollonin shpërthimet e kundërshtarit për të vulosur suksesin në shifrat 121-106, me takimin e gjashtë që tashmë do të zhvendoset në fushën e Lekërsave. Protagonisti kryesor i triumfit të Golden
Stejt ishte pa dyshim Stef Cërri, autor i 27 pikëve, 8 asistimeve dhe 3 ribaundeve, por këtë herë me një përqindje të pazakontë negative në finalizimet për 3 pikë, me 3 gjuajtje të sakta nga 11 tentativat që ndërmori. Pas tij më të mirët për të zotët e shtëpisë ishin Uigins me 25 pikë dhe Draimond Grin me 20 pikë me 10 ribaunde. Për Lejkërast rendimentin më të lartë e kishte i zakonshmi Lebron Xhejms me 25 pikë, 9 ribaunde dhe 3 asiste, i ndjekur nga Devis me 23 pikë, 9 ribaunde dhe 3 asiste. Për Devisin në fund pati edhe momente frike, teksa u godit në mënyrë të pavullnetshme në fytyrë nga Lonei, duke u larguar me karrocë nga parketi, por pas ekzaminimeve nuk kishte asgjë për t’u shqetësuar. Tashmë Lejkërsat do të përpiqen të shfrytëzojnë “match pint”-in në shtëpi në ndeshjen e gjashtë gjysmëfinale në Perëndim.
NIKS-HIT 112-103 (2-3) - Rikthim i fuqishëm edhe për Nju Jorkun, teksa zhvilloi një ndeshje fantastike në shtëpi ndaj Majemit në gjysmëfinalet e Konferencës së Lindjes. Pas periodës së parë të dominuar nga Majemi (1424), “Knicks” gjetën forcat dhe e bënë diferencën në dy periodat e radhës, duke i fituar ato bindshëm 36-23 dhe 34-27, për ta menaxhuar më pas avantazhin në 12minutëshin e fundit. Edhe pse miqtë u afruan deri në -4 pikë, gjithçka më pas u mbyll 112-103 për Niks. Njeriu i ndeshjes në suksesin e njujorkezëve ishte Xhalen Brunson, i cili regjistroi 38 pikë, 9 ribaunde dhe 7 asiste. Shkëlqyen edhe RJ Berret me 26 pikë dhe Randëll me 24. Këta tre lojtarë ishin të vetmit që prekën kuotë dyshifrore pikësh për vendësit. Për Majemin Batler realizoi 19 pikë, Adebajo 18 dhe Robinson 17. Por tashmë në ndeshjen 6, Hit do të kenë avantazhin e fushës, teksa do të kërkojnë që t’i mbyllin llogaritë e kualifikimit para publikut të tyre dhe të kalojnë në finalet e “play off”-it.