Turneu ndërkombëtar i shahut rapid “Tahir Sali Bajraktari”, shkëlqen Aleksandër Xhembulla

177 shahistë konkurruan në evenimentin e mbajtur në Tiranë

Tirana priti turneun ndërkombëtar të shahut rapid “Tahir Sali Bajraktari”, një eveniment në kujtim të trajnerit dhe njërit prej themeluesve të ekipit të shahut “Valbona” të Bajram Currit, veteranit Tahir Bajraktari, që u nda jeta para pesë vitesh. Në këtë turne morën pjesë 177 shahistë nga Shqipëria (117), Kosova (38), Maqedonia e Veriut (10), Mali i Zi (4), Serbia (4) dhe Italia (4). Ndër shahistët e titulluar kishte 5 mjeshtër ndërkombëtarë (IM), 5 mjeshtër të FIDE-S (FM); 1 WFM, 1 WCM dhe 1 AIM (Arena International Master). Gjithashtu merrnin pjesë 8 femra. Turneu në fjalë qe një festival i vërtetë i shahut në Shqipëri, pasi asnjëherë tjetër nuk është zhvilluar ndonjë turne ndërkombëtar apo kombëtar qoftë, me pjesëmarrje kaq të gjerë. Për këtë merita i takon në radhë të parë familjes së nderuar “Bajraktari” të Tropojës, që ishte dhe sponsorja e kësaj veprimtarie të bukur. Për organizimin e këtij turneu ndihmuan fuqimisht shahisti dhe kryetari i klubit “Valbona” Vladimir Katana, djali i të ndjerit Tahir, Fatmir Bajraktari; vëllai i Tahirit, Besnik Bajraktari (kryetar i FSHSH-SË në vitet 2009-2016) dhe anëtari i FSHSH-SË, i palodhuri Kristaq Andoni, që ishte gjithashtu kryegjyqtari i këtij turneu. Punë të lavdërueshme bënë edhe gjyqtarët Besnik Berisha (Kosovë), Fatmir Gërguri (Kosovë) dhe Pandi Borova (Tiranë). Para fillimit të garës përshëndeti në emër të familjes Bajraktari, Fatmir Bajraktari, ndërsa i ftuari i nderit, mjeshtri dhe pesë herë kampioni i Shqipërisë, veterani 75-vjeçar Vangjel Adhami, kreu në mënyrë simbolike lëvizjen e parë të të bardhit në pesë tavolinat e para. Pretendentë

për vendin e parë (duke u nisur nga shkalla e fortësisë Elo) qenë kampioni kombëtar Llambi Pasku, mjeshtrit ndërkombëtarë Seitaj dhe Ashiku, FM Endrit Uruçi (Kosovë), FM Zino Veleshnja, italiani Luka Albertini, IM Todoroviç (Serbi), FM Suljoviç (Serbi), Besim Uruçi (Kosovë), FM Lorenc Rama, Ramë Rama (Kosovë), Riza Bregu etj. Jashtë çdo parashikimi befasinë më të këndshme të këtij

turneu na e dha 17-vjeçari i klubit “Partizani” Aleksandër Xhembulla (Elo 2083; i vendosur paraprakisht në vendin e 19-të të renditjes së lojtarëve sipas fortësisë Elo), që zuri vendin e parë me 8 ½ pikë në 9 takime duke barazuar vetëm me kampionin Llambi Pasku. Ai është stërvitur nga trajneri i apasionuar Arjan Bllaca. Shahisti i ri Xhembulla zhvilloi një lojë të arsyeshme dhe u tregua shumë gjakftohtë edhe në situatat më të vështira. Një djalosh me shumë të ardhme në shah. Në vendin e dytë u rendit kampioni ynë IM Llambi Pasku me 8 pikë dhe në vendin e tretë FM Zino Veleshnja me 7 ½ pikë. Po 7 ½ pikë mori edhe FM Endrit Uruçi i Kosovës (Elo 2319), që u klasifikua i katërti. I zhgënjyer mbeti nga ky turne IM Franc Ashiku, që me humbjen në turin e fundit zbriti në vendin e 12-të. Nga të rinjtë rezultat shumë të lartë mbërriti 15-vjeçari Ergit Ramaj, djali i mjeshtrit të mirënjohur Lorenc Ramaj, i cili me 6 ½ pikë zuri vendin e trembëdhjetë. Rezultate mjaft të mira patën edhe shahistët e njohur Çlirim Guxho (vendi i 11të), Agim Hoxha (vendi i 14të)

dhe K/mjeshtri veteran i Flamurtarit të Vlorës Ferdinand Bezhani (73 vjeç, vendi i 18-të). Nga femrat, 14 herë kampionia Eglantina Shabanaj (WCM; Elo 1987) u rendit e para me 6 pikë, duke zënë vendin e 30-të në klasifikimin e përgjithshëm. E dyta u rendit 17-vjeçarja e mirënjohur Klean Shuqja (WFM) me 5½ pikë (vendi i 49-të) dhe e treta Eklea Omeri me 5 pikë (vendi i 62të). Përshtypje shumë të mirë la në këtë turne nxënësja e klasës së pestë, 11-vjeçarja Ajlin Ndreko (Tiranë), që luajti me forcë dhe siguri, duke fituar tri pikët e para në një turne ndërkombëtar. Formati i këtij turneu qe Rapid 10’+5’’ bonus për lëvizje me 9 raunde dhe i reitinguar në FIDE. Çmimet për 6 vendet e para varionin nga 300€ (treqind) në 30€ (tridhjetë) dhe 100€ për vendin e parë të femrave. Përfundimi me sukses i këtij turneu të madh të shahut rapid në Tiranë me siguri që do të na shërbejë dhe nxisë për ta zhvilluar në të ardhmen, krahas turneve të blicit dhe rapidit, edhe turne të tjera ndërkombëtare të shahut klasik. GJERGJ M. ZAVALANI