Sunday League, Prestige likuidon Novën dhe fluturon në gjysmëfinale
Prestige ka marrë një sukses tepër të rëndësishëm në Sunday League, duke siguruar biletën mes katër ekipeve më të mira të këtij kompeticioni. Një herë kampionët e SLA mundën dje Novën në çerekfinale me rezultatin 2-1. Limani dhe Shini ishin protagonistët e golave për skuadrën e drejtuar nga Eldiano Topi, ndërsa në fund një autogol nga Rapo i ngushtoi shifrat në 2-1. NDESHJA – Tashmë me inaugurimin e fushave pranë Federatës Shqiptare të Futbollit, faza finale “play off” e Sunday League është zhvendosur aty. Prestige dhe Nova zbritën në fushë më qëllimin e qartë për t’u bërë pjesë e gjysmëfinaleve. Për Prestige mjaftuan më pak se 2 minuta lojë
për të gjetur avantazhin, teksa pas një harkimi të bukur të Rapos nga e majta, Limani finalizon saktë, duke e çuar topin në rrjetë. Një gol që ia bën më të thjeshtë punën për Prestige, ndërsa Nova e nis menjëherë me malore. Minutat e para karakterizohen nga dominimi i Prestige, që luan me qarkullim të shpejtë të topit dhe me vertikalizime,
duke e vendosur në mënyrë konstante në vështirësi kundërshtarin. Provon sërish Limani fluturimthi, por pa gjetur kuadratin, ndërsa Hysenbelliu tenton me vertikalizime, duke krijuar situata të rrezikshme në sulm për Prestige. Nova provon kryesisht me 2-3 tentativa nga distanca, por pa mundur që të shënjestrojë portën, me pjesën e parë që mbyllet 1-0. Në fraksionin e dytë, Nova nis të shtyjë më shumë përpara, por mbrojtja e Prestige dhe portieri Cara janë të vëmendshëm. Ademi për pak se nuk shënon të dytin në të 40-ën, por topi i devijuar prej tij nuk shkon në portë. Prestige, i vendosur mjaft mirë në fushë, nuk i jep shumë shanse Novës, ndërsa në të 55ën, Shini i sapofutur në lojë i dërgon shifrat në 2-0, teksa tregohet më i shpejtë se të gjithë, për të përfituar nga një rrëmujë në zonë. Por në aksionin pasardhës Nova ngushton në 2-1. Topi i goditur me kokë nga Gent Muça fillimisht shkon në traversë, për t’u përplasur më pas në trupin e Rapos, duke u ndalur në rrjetë. Minutat e fundit janë shumë të luftuara, por Prestige i menaxhon mirë ato, duke mos rrezikuar thuajse asgjë. Kështu gjithçka mbyllet 2-1 për Prestige, që në gjysmëfinale do të gjejë ekipin Dussel. Këta të fundit në çerekfinale eliminuan ATSNË, ndeshje që u vendos nga penalltitë, pasi koha e rregullt dhe shtesat u mbyllën pa gola.