Gocaj: E mendoja të ngjitur Flamurtarin kur ika, duhet të tregohen më... cinikë
E la ekipin në krye dhe tani janë në “play off”, ish-mbrojtësi analizon situatën
Flamurtarin e la në vendin e parë, por sot që flasim situata ka marrë tjetër rrjedhë. Janë të tretët dhe zyrtarisht u mbetet që ta të diskutojnë ngjitjen në ndeshjet shtesë. Jemi duke folur për Olsi Gocajn, që prej muajit dhjetor është shkëputur në Amerikë. Shkodrani shpreh keqardhje që skuadra nuk e siguroi direkt misionin “Superiore”. Në një intervistë për “Panorama Sport”, mbrojtësi është optimist, sidoqoftë. Ai beson se do ta kalojnë me sukses “play off”-in, pasi cilësia në organikë nuk mungon.
U bënë 5 muaj që jeni larguar në Amerikë, por a po e ndiqni Flamurtarin?
Sigurisht që e kam ndjekur. Edhe pse jam larg në Amerikë, i kam ndjekur thuajse të gjitha ndeshjet, jo vetëm të Flamurtarit. Kam shumë interesim për atë çfarë ndodh në kampionatin shqiptar. Ndjek me shumë kuriozitet dhe vëmendje gjithçka që ndodh në Superiore dhe Kategorinë e Parë, pasi kam dhënë kontributin tim edhe unë në këto skuadra që militojnë në këto kategori dhe aty kam shumë shokë dhe miq.
E latë Flamurtarin në vendin e parë, por tani duhet të diskutojnë ngjitjen përmes “play off”it. Si e vlerësoni këtë?
Të them të drejtën më vjen shumë keq që gjërat shkuan ashtu... Në kohën që unë u largova, Flamurtari ishte në vend të parë dhe mendoja që do të ishte çështje kohe ngjitja në Superiore. Por në fakt, situata ndryshoi dhe gjërat nuk shkuan mirë. Por mendoj se e kanë edhe një mundësi të fundit. Shpresoj që do t’ia dalin. Jam i bindur për këtë. Pavarësisht se do të ishte më mirë ndoshta që ta realizonin direkt ngjitjen, pasi tani do të ishin më të qetë. Megjithatë, shanset i kanë.
Çfarë duhet që të bëjnë për të kaluar ndeshjen e “play off”-it? Mendoj që duhet t’i marrin ndeshjet që kanë mbetur një e nga një. T’i kalojnë të parat dhe më pas të fokusohen te finalja. Me pak kujdes do ta kalojnë edhe të 8-ën e Superiores dhe do të ngjiten. Flamurtari ka një grup shumë të mirë dhe me cilësi, por duhet të tregohen të kujdesshëm për arritjen e këtij objektivi madhor, që mezi po e presin në Vlorë. Unë gjej rastin t’u uroj suksese në këtë rrugëtim të fundit dhe dua që ta shoh Flamurtarin sa më shpejt në Superiore.
Sa të bindur jeni se do të ngjiten?
Unë kam shumë besim te realizimi i objektivit. Uroj dhe shpresoj që ta realizojnë. I kanë mundësitë. Kanë një mbështetje të pakursyer nga presidenti Idrizi, që të lë të punosh dhe nuk ndërhyn kurrë. Kështu që e kanë në dorë vetë, po të tregohen cinikë dhe të shpalosin arsenalin e tyre, do ta kalojnë me sukses.
Aktualisht jeni në Amerikë. Me çfarë po merreni?
Momentalisht po kaloj kohën me familjen time, por po merrem edhe me futboll sigurisht. Është pasioni im, por edhe puna e profesioni. Nuk e konceptoj dot veten pa futboll.
Në Shqipëri e mendoni një rikthim?
Në Shqipëri patjetër që do të kthehem, nuk diskutohet. Por jo në rolin e trajnerit, të paktën jo tani për tani. Pas disa kohësh, ndoshta. ERMAL SIKA
(4-2)
(4-2)