Mbahet turneu ndërkombëtar “Muhamet Malo”, Kevin Kupi e Zelimkhan Abakarov më mirët
Për dy ditë më radhë më datat 13-14 maj në Tiranë u zhvillua turneu ndërkombëtar i mundjes, “Muhamet Malo”, që këtë vit mbante edicionin e tij të tretë. Një kompeticion që sa vjen dhe bëhet më masiv, teksa këtë herë shënoi pjesëmarrjen e rreth 170 sportistë nga 12 shtete, të cilët dhuruan sfida mjaft të bukura në sallën “Farie Hoti”. E shtuna ishte dita e dueleve në stilin greko-roman. Në këtë stil sportisti më i mirë i aktivitetit u shpall Kevin Kupi i Shqipërisë, i cili fitoi medalje të artë në peshat 77 kg. Ndërkohë duke shtuar medaljet e argjendta nga Jurgen Uku (63 kg), Ardit Ndoj (77 kg), si dhe të bronztat e Andi Dyshnikut (63 kg), Ardit Zenelit (67 kg), Juljan Shehut (97 kg) dhe Eduard Picës (130 kg), kombëtarja shqiptare arriti që shpallej kampione ekipore në mundjen greko-romane, ose siç njihet ndryshe në atë klasike. Më pas të dielën ishte radha për ndeshjet e stilit të lirë. Në këtë stil, çmimin e sportistit më të mirë të aktivitetit e fitoi Zelimkhan Abakarov. Kampioni i Botës për Shqipërinë bëri të tijën medaljen e artë në peshat 61 kg. Medalje ari për flamurin kuqezi regjistroi edhe Islam Dudaev (65 kg), ndërsa Eriglent Prizreni (70 kg) dhe Paris Karepi (125 kg) regjistruan medalje argjendti. Në klasifikimin ekipor në stilin e lirë, Shqipëria u rendit e dyta, pas Kazakistanit. Kështu turneu “Muhamet Malo” uli siparin pas dy ditësh duele mjaft të bukura, me adrenalinë dhe me një nivel tepër të lartë, duke i argëtuar jo pak të pranishmit. Në tabelë pasqyrohen të gjithë kampionët sipas peshave si dhe renditjet ekipore.