Kastrioti, shansi i fundit luhet në Durrës
Mbaron pezullimi, krutanëve u rikthehet mbrojtësi Selmani
Tri pikë mjaft të vyera ndaj Egnatias, kanë bërë që te Kastrioti të rritet besimi dhe shanset për të mbijetuar. Teksa ndodhen katër pikë nga vendi i tetë që mbahet nga Erzeni dhe të dërgon në një ndeshje shtesë për të qendruar në kategori, krutanët do të tentojnë fitoren ditën e nesërme me Teutën në “Niko Dovana”. Takimi do të nisë në orën 16:00, ashtu si edhe të gjithë përballjet e tjera që janë caktuar në të njëjtën orë. Sa i përket lojtarëve, një rikthim në repartin e mbrojtjes do të jetë Adolf Selmani, futbollisti i cili ka shlyer pezullimin nga Komisioni i Disiplinës dhe do të jetë gati për trajnerin Emiljano Çela në këtë takim. Mungesa të sigurta janë dy mbrojtësit e krahut, Eneid Kodra dhe Armando Rami, i pari është i pezulluar dhe i dyti i larguar jashtë shtetit. Gjithashtu një mungesë është edhe sulmuesi Spartak Ajazi, i cili ka mbyllur sezonin para kohe për shkak dëmtimi. Edhe pse me mungesën e dy-tri titullarëve, lojtarët zëvendësues si Zogaj, Bejzade kanë bërë mirë punën e tyre në fushë, po ashtu edhe Arapi e Çela, të cilët u aktivizuan në pjesën e dytë me Egnatian. Ndërkohë përgatitjet antiteuta kanë vazhduar normalisht edhe dje, teksa Çela është qartësuar edhe për titullarët që do të zbresë në fushë. Krutanët kanë të vetëdijshëm që është një transfertë e vështirë, por fitorja është mënyra e vetme për mbijetesën dhe çdo rezultat tjetër do të ulte ndjeshëm shanset, ku jemi vetëm tri javë nga përfundimi i kampionatit. SHKËLQIM HASANI