Taulant Stërmasi, president i ri i atletikës shqiptare
“Do të jem mbështetje për sportistët, teknikët e klubet”
Asambleja e Jashtëzakonshme, trajneri fiton zgjedhjet
Federata Shqiptare e Atletikës ka zhvillu ar dje Asamblenë e Jashtëzakonshme Zgjedhore, e cila u mbajt në Parkun Olimpik në Tiranë. Në garë për të marrë drejtimin e FSHA-SË ishin Taulant Stërmasi, Ferdinand Canaj dhe Artan Shyti. Në asamble morën pjesë përfaqësues të klubeve(shoqata) me të drejtë mandati, ndërsa i pranishëm ishte edhe përfaqësuesii Ministrisë së Arsimit dhe Sportit, zv.ministri, Endrit Hoxha. Duke kaluar te zhvillimi i asamblesë, në raundin e parë të votimit nga 17 anëtarë të mandatuar prej klubeve, Stërmasi mori 8 vota, Canaj 6 dhe Shyti 3, duke bërë që votimi të shkonte në balotazh, ndërsa në garë mbetën vetëm Stërmasi dhe Canajn. Më pas në votimin e dytë, Taulant Stërmasi mori 10 vota, kundrejt 7 votave të Canajt, duke u zgjedhur kështu president i Federatës Shqiptare të Atletikës me shumicë votash. Stërmasi do të jetë në krye të federatës për një vit, pasi, siç dihet, në 2024-ën përfundon cikli olimpik dhe të gjitha federatat do t’u drejtohen zgjedhjeve të reja, me drejtuesit që do të kenë mandat 4-vjeçar. Stërmasi merr kështu drejtimin e FSHA-SË, duke ardhur në këtë post si trajneri më i suksesshëm i atletikës shqiptare. Trajneri i Luiza Gegës dhe i skuadrës së Tiranës, njihet për profesionalizmin e lartë, gjë që është pasqyruar më së miri edhe në rezultatet e jashtëzakonshme, teksa vetëm një sezon më parë do të shënonte arritjen më të madhe të historisë së atletikës shqiptare, me Luiza Gegën që shpallej kampione e Europës me rekord në garën e mbajtur në Mynih. Por me zgjedhjen si president, Stërmasi ka zbuluar se ka dhënë dorëheqjen nga posti i trajnerit. I lumtur që mori besimin e shumicës së komunitetit të atletikës, Stërmasi në mbyllje të asamblesë, ndër të tjera, u shpreh: “Ju falënderoj të gjithëve. Ajo që mund të them është se do të jem mbështetje e madhe për sportistët, për trajnerët dhe sigurisht për klubet, pasi janë këto tri pika që po e mbajnë sportin në këmbë sot. Jemi në një situatë që për fat të mirë Ministria e Sporteve dhe qeveria shqiptare po bëjnë investime të jashtëzakonshme dhe ne duhet
të jemi gati me projekte për të përfituar nga këto investime. Nuk mund vetëm të kërkojmë, nëse nuk i kemi kërkesat tona të argumentuara. E kemi mundësinë për të qenë në nivele shumë të larta dhe të përfaqësohemi ndërkombëtarisht në nivele të shumë të larta. Edhe një herë ju them faleminderit të gjithëve”, deklaroi presidenti i ri FSHA-SË. Kujtojmë se kjo asamble e jashtëzakonshme zhvillohej për shkak të pezullimeve të Gjergj Rulit dhe Nikolin Dionisit. Ishpresidenti dhe ish-sekretari, siç dihet, u dënuan nga Njësia e Integritetit të Atletikës si të përfshirë në manipulimin e rezultatit për garën e kërcimit të Izmir Smajlajt, event i mbajtur më 8 maj 2021 në kryeqytet. Si Ruli gjithashtu edhe Dionisi, ishin të pranishëm në asamble, të cilët mbajtën edhe fjalimet e rastit.