Rrufe në qiell të hapur, Spaleti mendon dorëheqjen
Luçiano Spaleti i ka rik thyer Napolit titullin që i mungonte prej 33 vitesh, por kjo duket se nuk ka mjaftuar që mes trajnerit dhe klubit marrëdhënia të ishte afatgjatë. Ndërkohë që ka edhe një vit kontratë me klubin e saposhpallur kampion, të Italisë nuk përjashtohet mundësia që 64-vjeçari t'i japë lamtumirën qysh këtë vit stolit "axurr", pasi mes tij dhe presidentit Aurelio de Laurentis gjërat nuk po shkojnë si duhet. Një javë më parë palët kanë darkuar së bashku, por asnjëri nuk ka zbuluar për mediat bisedën. Të dy dolën të buzëqeshur, por pa asgjë konkrete për sa u përket planeve për të ardhmen, përkundrazi distanca mes tyre duket se është thelluar, të paktën në raportin profesional. Sipas asaj që tregon "Corriere dello Sport" Luçiano Spaleti është gati të japë dorëheqjen nëse presidenti nuk merr perisper ta rregullojë vetë situatën, me De Laurentisin që e konsideron të kryer detyrën e tij pasi kishte propozuar të ushtrohej e drejta e njëanshme për t'ia rinovuar edhe për një vit kontratën Spaletit.
PËRPLASJET - Vetë presidenti, që njihet për karakterin e tij të fortë, në fakt nuk ka ndër mend të presë gjatë dhe ka tashmë në mendjen e tij një listë me emra për ta zëvendësuar Spaletin. Ky i fundit, nga ana tjetër, ka veçanërisht tri arsye të krisjes së tij me De Laurentisin, siç raporton e përditshmja italiane. Propozimi për rinovimin i ka ardhur Spaletit jo nga vetë presidenti, por nga një ekzekutiv i klubit, arsyeja e parë e mërisë së tij. E dyta i përket pikërisht mënyrës që presidenti ka aplikuar për rinovimin, pa e pyetur trajnerin, që e ka marrë si presion të klubit këtë lëvizje, pa marrë edhe konfirmimin e tij. Në fund, telefonata e munguar e 73-vjeçarit pas fitores së kampionatit në Udine nuk ka lënë aspak shije të mirë te Spaleti, që tashmë po qëndron ende në pritje të lëvizjeve të Napolit, për të marrë në fund të sezonit një vendim për të ardhmen e tij, që për momentin duket larg "axurrëve".