Portieri hero, kalon Flamurtari
Barazimi i Umejiegos nuk mjafton, Asllanaj djeg shanset e Apolonisë për elitën
Pedro shënon i pari dhe më pas humb penallti, por në fund mendon Kuka t’i mbajë në lojë
Flamurtari vazhdon garën në “play off”. Edhe pse finalja me Apoloninë përfundoi në shifrat 1-1, perfitoi nga avantazhi që i jepte rregullorja. Rruga për të realizuar objektivin “Superiore” është ende e gjatë, sidoqoftë, pasi tani duhet të kalojnë Korabin dhe më pas ekipin që do të renditet në vend të 8-të në Superiore. Ishte një ndeshje dramatike ajo që u zhvillua dje në Vlorë. Pati nerva, dëmtime, gola të bukur, penallti të humbura, kartonë të kuq e të verdhë dhe shumë lot. Nëse Pedro shënoi gol dhe gaboi nga pika e bardhë, mendoi Kuka që të bënte heroin. Ai priti penalltinë e Asllanajt në fund dhe zhvlerësoi barazimin e Umejiegos.
PJESA E PARË
Ndeshja me ritëm, por vetëm në të 6-ën krijohet aksioni i parë konkret. Është Ribaj që gjuan fort, por grushton Harizaj. Në të 18-ën Beqaj tenton me të djathtën, por pa sukses. Me kalimin e minutave agresiviteti shtohet, aq sa Beqja dëmtohet në fytyrë pas një ndërhyrjeje dhe më vonë Umejiego përplaset me kokë me Liçajn. Ethet shtohen në të 39-ën, kur për pak Beqja gjen golin. Kuqezinjtë shtojnë presionin, ndërsa bardhejeshilët janë më të tërhequr. Në të 42ën Orelesi ka probleme me kaviljen dhe bëhet gati Maksuti që ta zëvendësojë, por nigeriani refuzon. Dëshironte që të qëndronte në lojë, e megjithatë në të 4-ën minutë shtesë, nga 6 që u akorduan, mesfushori u dorëzua dhe la fushën. Maksuti, i sapofutur në fushë, bëhet direkt protagonist. Shërben për Gjatën, i cili fluturimthi lëshon një predhë që përplaset në tokë e më pas në duart e Kukës. Kur u duk që do të mbyllej këtu, në limitet e shtesës, vlonjatët zhbllokojnë shifrat. Pedro shkarkon nga 16 metra dhe topi përfundon në rrjetë, 10, mbyllet pjesa e parë.
PJESA E DYTË
Flamurtari kthehet i rrezikshëm nga pushimi, por rastet vetëm sa i shpërdorojnë. Hallet shtohen rrugës për Apoloninë, kur dëmtohet Omeri. Ka një problem serioz në krah dhe detyrohet të lërë lojën. E megjithatë, fierakët në të 63-ën befasojnë. Një kros nga e djathta gjen Umejiegon, që nuk fal dhe u jep shpresë fierakëve. Ethet shtohen më shumë, kur tre minuta më vonë ka penallti për vendësit. Fernando ndalet në zonë nga Ndubuisi dhe për kryesorin Hamiti ka 11metërsh. E merr përsipër Pedro, por gjuajtja është për të vënë duart në kokë. Apoloninë e lë edhe M.gjata, që zëvendësohet pas një shqetësimi muskulor. Përtej gjithçkaje, skuadra e Veljko Dovedan nuk dorëzohet dhe është kërkuese. Çerekorëshi i
fundit ka shumë tension, pasi Repaj tërheq nga fanella Oliveirën dhe disa të verdhë. Një minutë para fundit, mund të ndodhte përmbysja e frikshme. Kuka ndërpret një inkursion të Maksutit në të 89-ën dhe penallti. Nga pika e bardhë gjuan Asllanaj,
por portieri i vlonjatëve shlyen gabimin dhe pret penalltinë e shkaktuar prej tij. Kryesori sinjalizon 6 minuta shtesë, por ato nuk do të sillnin asgjë, përveç një të kuqi për Ndubuisin. Flamurtari feston në fund kalimin në finalen tjetër të “play off”-it.