Kumbarçe: Tomorin e ndëshkuam me skemë të provuar në stërvitje
Trajneri i Korabit, Shpend Kumbarçe, është i lumtur për suksesin e arritur, teksa për të dytin sezon radhazi dibranët i shkojnë deri në fund garës për t’u ngjitur në Superiore. Në prononcimin pas ndeshjes, ai theksoi se humbja e dy javëve më parë përballë Tomorit i kishte ndihmuar shumë. Sipas Kumbarçes, strategjia e lojës në pritje kishte rezultuar efikase në Berat. “Jemi të kënaqur, sepse skuadra ka zbatuar në mënyrë perfektë detyrat që i kishim dhënë ne si staf. Ishte ndeshje e përgatitur jashtëzakonisht mirë. Goli me goditje dënimi ishte i punuar dhe i provuar në stërvitje. Luajtëm dy javë më parë në Berat dhe analizuam me detaje të gjitha situatat që ndodhën në ndeshjen që humbëm 3-1. E kishim parashikuar këtë lloj vështirësie, për vetë kontingjentin që ka Tomori, sidomos në fazën e dytë. Në fazën e parë kemi qenë shumë efikas, ndërsa në fazën e dytë patëm disa probleme dhe dinamika brenda grupit, me dëmtime e kartonë, por edhe largime. Që kur kemi nisur fazën përgatitore kemi besuar gjithmonë dhe skuadra na e shpërbleu”, ka thënë fillimisht Kumbarçe, ndërsa foli edhe për sfidën me Flamurtarin. “Luajmë me një skuadër që ka qenë simpatike gjatë kampionatit, por ne do të bëjmë detyrën. Kemi shanset tona, tani luhet vetëm për fitore. Të shkonim deri këtu e kishim detyrë, në radhë të parë për presidentin që bën shumë sakrifica për ne, për tifozerinë e zjarrtë që kemi në Peshkopi, e cila na kontestuar me të drejtë në disa ndeshje. Shpresojmë që të kemi kthyer besimin”, deklaroi trajneri i Korabit për “Oversport”.