E rrallë, rrebeshi anulon garën në Rrethin Çiklistik
Stedman ruan fanellën e verdhë, sot mbyllet turi në Fier
Kaos në etapën Vlorë-përmet, stuhia e ndërpret në mes
Rrethi Çiklistik i Sh qipërisë ka shënuar dje një rast të veçantë dhe ta paprecedentë. Etapa e katërt, Vlorë-mbrostar-përmet me distancë 180 kilometra, është ndërprerë për shkak të kushteve të vështira të motit. Pas afërsisht 135 kilometrash, kryekomisari izraelit vendosi zyrtarisht për pezullimin e garës, pasi vijimi i saj ishte i pamundur. Nëse nga Vlora starti u bë me diell, më tej me kalimin kilometrave filluan vranësirat dhe më pas reshjet, të cilat u intensifikuan ndjeshëm edhe me stuhi, duke bërë që në dalje të Memaliajt të kishim një rrebesh të madh, i cili solli edhe pezullimin e garës. Për minuta me radhë u krijua një situatë kaotike, me çiklistët që nuk kishin ku të futeshin, duke u sistemuar të ngjeshur nëpër makina bashkë me stafet dhe organizatorët dhe me biçikletat të lëna në rrugë. Për rreth një orë u krijua trafik kilometrik, duke qenë se rruga ishte e bllokuar në të dyja kahet nga policia. Më tej çiklistët iu drejtuan Përmetit me makina. Kështu etapa e katërt, Vlorë-përmet, e cila ishte edhe më vendimtarja e të gjithë turit, zerohet, ndërsa gjithçka do të vazhdojë sot me etapën e fundit Përmet-fier, me rezultatet që do të nisin aty ku ishin lënë në përfundim të etapës së tretë.
SITUATA ME RENDITJEN – Me anulimin e etapës së katërt renditja e përgjithshme e Turit të Shqipërisë mbetet e pandryshuar.
Kështu, mbajtës i fanellës së verdhë është përsëri Maximilian Stedman. Britaniku i skuadrës Velo Schils, lider i turit, regjistron kohën totale 9:49:28, ndërsa pas tij me diferencë të ngushtë kohore vijnë rumuni Cristian Raileanu i skuadrës CSA Steaua Bukuresht (+0:04) dhe Periklis Ilias i Greqisë (+0:08). Menjëherë
pas tyre pozicionohet Mikel Demiri i Shqipërisë, në vend të katërt, me diferencë prej 13 sekondash nga kreu. Një paraqitje shumë e mirë e Demirit, që mbetet pretendent deri në fund për triumfin. Rrethi i 80të Çiklistik do të ulë siparin sot me etapën e pestë dhe të fundit, Përmet-fier, 123 km. Kujtojmë që në këtë eveniment, marrin pjesë 14 skuadra, nga të cilat 11 janë ndërkombëtare, ndërsa distanca e përgjithshme e turit është 754 km. Për të pestin vit radhazi ky aktivitet është pjesë e Kalendarit Ndërkombëtar të Çiklizmit (UCI), që e bën një event kualifikues për Kampionatin Botëror dhe Lojërat Olimpike.