Laska dënohet nga Disiplina, ofendoi vëzhguesin Arjan Mali
Komisioni i Disiplinës në FSHF-SË ka publikuar vendimet për ngjarjet e fundit në ndeshjet e Kategorisë Superiore dhe Kategorisë së Parë. Presidenti i Laçit, Pashk Laska është dënuar me 5 ndeshje pezullim dhe i ndalohet hyrja në të gjitha stadiumit. Mësohet se Laska ka shfaqur një sjellje anti-sportive nga zyrtarit të ndeshjes, vëzhguesit Arjan Mali, pas përfundimit të takimit me Teutën një javë më parë. Gjoba ka pasur dhe për Vllazninë, Partizanin dhe Tiranën. Po kështu ka pasur edhe dënime në kategoritë e ndryshme.
VENDIMET E DISIPLINËS
1. Zyrtari i KF Laçi, Pashk Laska, për sjellje josportive ndaj zyrtarëve të ndeshjes, në bazë të nenit 14/1/j të KDE-SË dënohet me 5 (pesë) ndeshje pezullim nga aktiviteti. Në zbatim të nenit 6/2/c të KDE-SË, zyrtarit i ndalohet hyrja në të gjitha stadiumet, në veprimtaritë sportive të organizuara nga FSHF, deri në përfundim të dënimit.
2. KF Vllaznia, për sjellje të gabuar të spektatorëve, duke ndezur flakadanë dhe hedhur sende në fushën e lojës, në bazë të neneve 17/2/b dhe 17/2/c të KDE-SË, dënohet me gjobë në masën 100.000 (njëqind mijë) lekë.
3. FK Partizani, për sjellje të gabuar të spektatorëve, duke ndezur flakadanë, në bazë të nenit 17/2/c të KDE-SË, dënohet me gjobë në masën 50.000 (pesëdhjetë mijë) lekë.
4. KF Tirana, urdhërohet të dëmshpërblejë dëmet e shkaktuara në Stadiumin "Air Albania" sipas akt konstatimit, brenda 15 ditëve.
FK Bylis, për sjellje të gabuar të spektatorëve, duke ndezur mjete piroteknike dhe hedhur sende në fushën e lojës, në bazë të neneve 17/2/b dhe 17/2/c të KDE-SË, dënohet me gjobë në masën 100.000 (njëqind mijë) lekë.
5. KF Vora, për sjellje të gabuar të spektatorëve, duke hedhur sende në drejtim të lojtarëve në fushën e lojës, në bazë të nenit 17/2/b të KDE, dënohet me gjobë në masën 100.000 (njëqind mijë) lekë.
6. Zyrtari i KF Luzi Vogël 2008, Arvin Lusha,për sulm fizik ndaj zyrtarëve të ndeshjes, në bazë të nenit 14/1/l të KDE dënohet me 2 (dy) vite pezullim nga aktiviteti. Në zbatim të nenit 6/2/c të KDE-SË, zyrtarit i ndalohet hyrja në të gjitha stadiumet, në veprimtaritë sportive të organizuara nga FSHFJA, deri në përfundim të dënimit.
7. Zyrtari i KF Luzi Vogël 2008, Arbër Lusha, për sjellje josportive ndaj zyrtarëve të ndeshjes, në bazë të nenit 14/1/i të KDE-SË dënohet me 5 (pesë) ndeshje pezullim nga aktiviteti.
8. KF Luzi Vogël 2008, për sjellje të gabuar të spektatorëve, duke hedhur sende në terrenin sportiv dhe duke shkaktuar dhunë ndaj zyrtarëve të ndeshjes, në bazë të neneve 6/3/b, 6/ 3/d 17/1/c, 17/2/b, 17/2/f, 17/2/h dhe 35 të KDE-SË, dënohet me zhvillimin e 4 (katër) ndeshjeve pa spektatorë dhe në fushë asnjanëse.
9. FK Tomorri, për sjellje të gabuar të spektatorëve, duke hedhur sende në fushën e lojës, në bazë të nenit 17/2/b të KDE-SË, dënohet me gjobë në masën 50.000 (pesëdhjetë mijë) lekë. Sipas nenit 76/1/a të KDE, gjoba të aplikohet në masën 50%.
10. KF Burreli, për sjellje të gabuar të spektatorëve, duke hedhur sende në fushën e lojës, në bazë të nenit 17/2/b të KDE-SË, dënohet me gjobë në masën 50.000 (pesëdhjetë mijë) lekë. Sipas nenit 76/1/a të KDE-SË, gjoba të aplikohet në masën 50%.
11. Pranimin e kërkesës së lojtarit të FK Skënderbeu, Mateo Burimi, pezullimin e pjesës së mbetur të dënimit. Periudha e pezullimit me kusht, në zbatim të nenit 34/1 të KDS, do të jetë 6 (gjashtë) muaj.
12. Pranimin e kërkesës së zyrtarit të KF Tirana, Akil Jakupi, pezullimin e pjesës së mbetur të dënimit. Periudha e pezullimit me kusht, në zbatim të nenit 34/1 të KDS, do të jetë 6 (gjashtë) muaj.
13. Rrëzimin e kërkesës së lojtarit të FK Butrinti Salvador Gjonaj, si të pabazuar në Kodin e Disiplinës dhe Etikës.