Pashja: Me Tomorin nis kthesa, kemi zgjidhur merakun e golit
Besa vjen në duelin e sotëm ndaj Tomorit më e kompletuar se kurrë më parë, kjo falë afrimeve të shumta e cilësore në merkaton e dimrit. Pritet që kavajasit të kenë sot testin e parë të vërtetë, ndonëse harmonizimi i grupit nuk ndodh me një seancë, apo me një javë. Rëndësi ka që verdhezinjtë kanë shumë më shumë alternative sesa më parë. Ky takim pritet me një kuriozitet të shtuar për të parë sulmuesin Mustafa Ba, si dhe për afrimet e fundit në merkato. Nuk dihet nëse Mustafa Ba do të startojë nga minuta e parë apo do futet si zëvendësues. Për trajnerin Lorenc Pashja, është luks të kesh këto afrime, por kërkohet kohë në marrjen e maksimumit të tyre. “Afrimet e janarit i kanë dhënë Besës më shumë muskuj, forcë por edhe cilësi. Këtë e pashë në Vlorë ndaj Flamurtarit, që realisht meritonim të fitonim. Afrimi
i Mustafa Ba është një vlerë e shtuar. Tani sfida jonë e vetme mbetet harmonizimi i grupit dhe marrja e maksimumit nga secili”, tha trajneri. Duke u ndalur te sfida me Tomorin, Pashja shprehet se me grupin e fazës së parë, barazuan në Berat dhe ishte Besa që udhëhoqi dy herë. “Tomorin e njohim mirë, pasi na barazuan në fushën e tyre. Them na barazuan, pasi ishte Besa që udhëhoqi takimin me lojë e gola. Tani ne vijmë më të fortë dhe besoj kemi zgjidhur edhe merakun se kush e bën golin. Kemi disa alternativa në sulm. Mustafa
Ba do të na ndihmojë shumë. Në fushë do hyjmë jo me euforinë e afrimeve, pasi futbolli ka kapriçiot e tij. Në fushë do futemi me bindjen se jemi më lart se Tomori dhe këtë duhet ta demonstrojmë në fushën e lojës. Ua kam bërë të qartë lojtarëve se fitohet vetëm duke sakrifikuar dhe duke u treguar i vëmendshëm në çdo situatë. Besoj fort te fitorja edhe si një autokritikë për gabimet që kemi bërë. Tani nis kthesa e madhe, që lidhet me fatet e Besës”, përfundoi trajneri Lorenc Pashja. FERIZ FERIZAJ