Odise Roshi gol fitoreje, Muçi shënon sërish në miqësore
Fieraku afron ekipin me Superligën turke, 4 rrjeta deri tani
Odise Roshi në kampionat dhe Ernest Muçi në miqësore, të dy lojtarët e Kombëtares kanë gjetur rrugën e rrjetës ditën e djeshme me klubet e tyre respektive. Roshi i dhuroi fitoren ekipit të tij në shtëpi, ndërsa Muçi shënon në miqësoren e dytë radhazi, pas asaj të pak ditëve më parë.
ROSHI- Odise Roshi ishte protagonisti absolut i Sakarjaspor duke i sjellë fitoren në duelin kundër Bandirmaspor në kampionat. Në minutën e 67- ë, mesfushori i Kombëtares goditi siç duhet me kokë topin për ta çuar në rrjetë pas një krosimi të ardhur nga këndorja. Ky ishte edhe goli i vetëm i këtij takimi dhe numri katër këtë sezon për Roshin në ligën e parë turke. Fieraku vijon të ndihmojë ekipin e tij për tu ngjitur në Superligë, teksa me këtë tri pikësh e ka afruar edhe më shumë me kreun.
MUÇI- Legia e Varshavës po kryen fazën përgatitore përpara rifillimit të kampionatit, teksa Ernest Muçi vazhdon të jetë protagonist. Sulmuesi i Kombëtares Shqiptare gjeti sërish rrugën e rrjetës në miqësore, pas asaj me Dinamon e Kievit pak ditë më parë, kësaj radhe goli erdhi kundër Rzezov. Në minutën e 38-ë, Muçi mori një top në zonë dhe goditi duke mposhtur portierin kundërshtar dhe duke vendosur baraspeshën, teksa rezultati u përmbys më vonë nga shokët e tij të skuadrës. Javën tjetër do të rifillojë edhe faza e dytë në kampionatin polak, ku Muçi do të kërkojë të ruajë formën e mirë deri në afrimin e kampionatit Europian me Shqipërinë. Deri tani, në të gjitha kompeticionet që ka luajtur me Legian e Varshavës për këtë sezon, Muçi ka shënuar 9 gola dhe ka dhënë 2 asiste në 34 ndeshje të luajtura.