Tirana në kaos, Halili i jep duart trajnerit Ahmataj
Tirana dhe Julian Ah mataj thuajse kanë ndarë rrugët, edhe pse në klubin bardheblu deri dje në mbrëmje nuk e pranonin që trajneri ishte shkarkuar. Fakt është që palët kanë thyer çdo bashkëpunim dhe konfirmimi i largimit pritet të ndodhë. Pas ndeshjes derbi, mes presidentit Refik Halili dhe trajnerit Julian Ahmataj, kanë pasur një takim, ku palët janë konfrontuar për gjendjen e ekipit. Halili ka akuzuar trajnerin si një nga përgjegjësit për performancën e dobët të skuadrës që kulmoi në derbi me humbjen, ndërsa trajneri nuk e ka pranuar një fakt të tillë. Takimi mësohet se ka qenë me tone të larta. Jo vetëm kaq, por numri një i bardhebluve ka kërkuar që Ahmataj të japë dorëheqjen nga drejtimi i skuadrës. Trajneri nuk ka pranuar të dorëhiqet. Çudia më e madhe ishte fakti se trajneri (Ahmataj) doli në konferencë para takimit me Teutën, foli për Kupën dhe në mbrëmje qarkulloi lajmi për shkarkimin nga ana e klubit e Julian Ahmatajt. I kontaktuar nga "Panorama Sport" në mbrëmjen e së hënës, presidenti Refik Halili mohoi që të ketë shkarkuar Ahmatajn, duke e konfirmuar në skuadër si dhe duke pranuar që ishte në takim me ekipin. Halili pranoi se kishte diskutuar me Ahmatajn në një takim për gjendjen e skuadrës, duke konfirmuar se i kishte kërkuar edhe dorëheqjen, por mohonte se skuadra ishte pa trajner dhe Juli ishte në krye të skuadrës. Një skemë e njohur kjo e Tiranës, pasi është parë edhe në rastin e trajnerëve të tjerë, ku klubi shpërndan një herë lajmin dhe më pas zyrtarizon shkarkimin. Tej të gjithave, paçka fjalëve, divorci i Ahmatajt me Tiranën i ndan vetëm zyrtarizimi. Erbim Fagu mund të jetë trajneri i ri i skuadrës, së bashku me Erjon Xhafën, ndërsa te dera qëndrojnë Migen Memelli dhe Ernest Gjoka.
DEKLARATA
Intervista e Julian Ahmatajt për mediat para takimit me Teutën.
Humbja në derbi, a do të ndikojë për paraqitjet e Tiranës për kampionat dhe Kupë?
Pavarësisht rezultatit që na ka mërzitur shumë, këtë e kemi shprehur edhe pas ndeshjes, skuadra prodhoi lojë. Vetëm si pasojë e disa gabimeve jemi mundur në atë ndeshje. Ndërkohë duhet të shohim përpara, pasi jemi brenda objektivave dhe duhet të luftojmë fort në çdo ndeshje për të arritur objektivat.
Me Teutën do të luani në Kupë, një ndeshje ku mund të vendoset shumë për gjysmëfinalen e këtij kompeticioni. Cili është vlerësimi juaj?
Është një tjetër ndeshje nesër(sot) nuk ka lidhje me kampionatin është me dy takime. Dhe asgjë nuk vendosët në sfidën e parë, por duhet të jemi vendosur. Të fortë, pasi edhe Kupa është objektivi ynë.
Në dy sfidat e fundit keni barazuar në Durrës. Si e vlerësoni kundërshtarin?
Kundërshtari është i fortë dhe agresiv sidomos në fushën e vetë, dhe ne duhet të përgjigjemi me të njëjtën monedhë.
Ju folët vetëm për agresivitetin e Teutës, por Tirana ka harruar të fitojë në Durrës...
Teuta ka një lloj agresiviteti. Ne u jemi përgjigjur me të njëjtën mënyrë. Kemi pasur takimin nën kontroll, flas për 0-2 në Durrës, por dhe duhet të jemi më solidë nesër(sot) në fushën e lojës. Do të përdorim lojtarët tanë më të mirë dhe më të fortë për këtë sfidë.
A ndikon kalendari i ngjeshur në këtë pikë të sezonit?
Kampioni ka shumë ngarkesë, por ne do të përdorim lojtarët më të mirë dhe lojtarët më në formë.
Nisni një "tur force", sepse do të luani me më të fortët. A ju frikëson ky fakt?
Diferenca mes ekipeve nuk ka. Skuadrat në këtë kampionat janë në të njëjtin nivel dhe ndeshjet i zgjidhin episodet. Në këtë aspekt të jemi të kujdesshëm për të mos pësuar aksidente dhe duhet të bëjmë më pak gabime.
Në fund të sezonit, me çfarë do të kënaqet nga Tirana e tij Julian Ahmataj?
Tirana ka vetëm një objektiv, titullin kampion. Ne duhet të sigurojmë vendin e katërt ose në "Final 4". Ne e kemi potencialin për të shkuar te titulli. Nuk e kemi vënë asnjëherë në dyshim dhe nuk jemi jashtë këtij objektivi. Edhe Kupa është objektiv i sezonit.