Shkurti muaj me halle, Ndreca bën “gropë” krahun e majtë
Muaji shkurt rezultoi aspak pozitiv për Egnatian, e cila mundi të grumbullojë vetëm 3 pikë nga 12 të mundshmet. Tri barazime, një humbje dhe asnjë fitore, rezultate që e kanë futur klubin rrogozhinas në një krizë rezultatesh, teksa distanca me vendin e dytë është gjashtë pikë. Skuadra e drejtuar nga Edlir Tetova në 360 minuta ka shënuar vetëm dy gola duke pësuar tri herë, ndonëse ka luajtur me dy ekipe si Vllaznia dhe Partizani. Bardhejeshilët nesër në "Arena Egnatia" presin Dinamon, një ekip që vjen pas disfatës me Vllazninë, por që në tërësi ka bërë mirë në këtë vit të kalendarik. Në dy takimet e mëparshme Egnatia ia ka dalë të grumbullojë 6 pikë me një golavarazh 5-1, edhe pse këtë herë llogaritë janë të hapura për të dyja ekipet.
MUNGESAT - Trajneri Tetova do të vuajë mungesën e Gjatës, Leminës, Ndrecës dhe Aleksit kundër Dinamos. Dy të parët vuajnë dëmtime, ndërsa Ndreca dhe Aleksi janë jashtë për shkak kartonësh. Egnatia i gëzohet faktit që nuk është mposhtur asnjëherë në shtëpi nga Dinamo dhe se ka patur këtë javë 24 orë më shumë kohë për tu përgatitur për këtë duel interesant.
RRESHTIMI - Me interes pritet të shihet sesi do të vendosen në fushë kryesuesit e Superligës, pasi në javët e fundit ka pasur disa module të aplikuar nga tekniku Tetova. Me shumë gjasa pritet të rikthehet titullar Renato Malota, i cili kundër Teutës nuk luajti asnjë minutë. Pas paraqitjes pozitive të një jave më parë të Rezart Ramës të shumta janë mundësitë që mbrojtësi i djathtë të startojë nga minuta e parë. Në balotazh për një fanellë titullari janë Xhemajli dhe Dylis, me këtë të fundit më i avantazhuar për të startuar në qendër të mbrojtjes. Mbetet të shihet sesi rrogozhinasit do të menaxhojnë mungesën e Edison Ndrecës, pasi ai është i vetmi mbrojtës i majtë në dispozicion të Tetovës. Në merkaton e janarit Musta dhe Memolla u larguan, duke i mundësuar Ndrecës minutazh të bollshëm dhe ky i fundit besimin e dhënë e ka justifikuar me gola dhe asiste. Në mesfushë Fernando dhe Zejnullai do të kenë partner Melih Ibrahimoglu. Juba Drame, edhe pse nuk është plotësisht gati fizikisht, i duhet minutazh në këmbët e tij për të rifituar formën sportive. Sebastjan Spahiu do të rikthehet titullar në të djathtë të sulmit, teksa Montenegro pritet të udhëheqë sërish majën e sulmit, kjo edhe për shkak të mungesës së Mario Gjatës.
SHIFRAT - Egnatia, jo vetëm kryeson tabelën e klasifikimit me 49 pikë, 6 më shumë sesa Vllaznia e vendit të dytë, por ka aktualisht edhe golavarazhin më të mirë me 17 gola plus. Rrogozhinasit kanë së bashku me Tiranën sulmin më të mirë të kampionatit me 43 gola të shënuar në 25 javë të luajtura. Rrogozhinasit kanë pësuar 26 gola, me një mesatare prej një goli për ndeshje. Të premten Egnatia do të mundohet të nis muajin e ri pozitivisht, me qëllim për t'u rikthyer te fitorja, e cila mungon prej 28 janarit. ISA HALILI