Derbi për mbijetesë, Marzuk është dyshimi i vetëm tek Erzeni
Sulmuesi nga Maroku u dëmtua para ndeshjes me Kukësin
Erzeni luan të shtunën derbin kundër Teutës në stadiumin “Niko Dovana” të Durrësit, ora 17:00. Kjo ndeshje vjen në një moment të mirë për shijakasit, të cilët u rikthyen te fitorja në kampionat, duke mundur në transfertë Kukësin me shifrat 2-1. Një lajm i mirë për trajnerin Skerdi Bejzade është fakti që këtë herë do të ketë të gjithë lojtarët në dispozicion. I vetmi titullar në dyshim është sulmuesi maroken, Junes Bnou Marzuk. Ky i fundit u dëmtua gjatë nxehjes para ndeshjes kundër Kukësit, duke prishur planet për formacionin. Bejzade u detyrua të aktivizonte nga minuta e parë Redon Mihanën, i cili vjen pas një dëmtimi disa javor dhe nuk është ende në 100 % të gjendjes së tij. Megjithatë, deri të shtunën shpresohet se Marzuk do të jetë i gatshëm. Ai është sulmuesi kryesor i shijakasve, teksa iu bashkua skuadrës në muajin janar, ndërsa ka arritur të shënojë vetëm një gol deri më tani. Ndërkohë, rikthime të rëndësishme për stafin teknik në derbin me durrsakët janë qendërmbrojtësi Nehar Sadiki dhe mesfushori Donald Mëllugja, të cilët kanë shlyer pezullimin për kartonë. Gjithashtu, pjesë e grupit në stërvitje është bërë edhe argjentinasi Rodrigo Migone, i cili prej dy javësh mungonte për shkak dëmtimi. Mesfushori me tipare sulmuese, do të jetë në dispozicion, duke shtuar edhe më shumë rivalitetin për formacionin. Bejzade ka bërë shpesh rrotacion në mesfushë, me brazilianin Andrei Alba që ka përfunduar në stol, duke u preferuar më shumë si zëvendësues. Shijakasit kanë kujtime të mira në dy fazat e para kundër Teutës, pasi kanë arritur të fitojnë një herë me gol të Kacbufit, ndërsa në fazën e dytë në Rrogozhinë ndeshja është mbyllur në barazim pa gola. Të dyja skuadrat luftojnë për mbijetesë. ERALD DERVISHI