Mehmeti: E dimë forcën e Egnatias, s’dalim pa pikë
DINAMO/ Trajneri: I godasim te pikat e dobëta
Pak ditë pas Vllaznisë, ku humbi 0-1, Dinamo luan një tjetër sfidë të rëndësishme dhe të vështirë. Blutë përballen sot me Egnatian kryesuese në Rrogozhinë në orën 13: 30, teksa vijnë në këtë sfidë pa dyshen e qendrës së mbrojtjes. Hoxha dhe Behiratçe janë të skualifikuar, i pari nga i kuqi kundër shkodranëve, ndërsa i dyti ka plotësuar 4 të verdhët. Megjithatë, në kampin dinamovit ka entuziazëm për rikthimin e shpejtë te rezultatet pozitive. Trajneri Dritan Mehmeti ka besim se edhe lojtarët që do të marrin vendin e atyre që mungojnë, do ta përfaqësojnë denjësisht Dinamon. Rritja në nivelin e lojës i jep besim trajnerit për një kthesë të shpejtë pas humbjes së fundit, pavarësisht vlerësimit që ka për kundërshtarin. “Në fakt, për këtë ndeshje nuk kemi pasur shumë kohë në dispozicion për ta përgatitur, pas asaj me Vllazninë. Kemi dy mungesa të konfirmuara, siç janë Hoxha dhe Behiratçe për shkak kartonësh. Kemi edhe një shqetësim me Andonin, që ka pasur probleme me kaviljen, përveç një dëmtimi të mëparshëm. Do të shikojmë çfarë vendimi do të marrim. Por mendoj se edhe lojtarët që do t’i zëvendësojë janë të denjë dhe meritojnë të prezantojnë Dinamon”, - ka thënë fillimisht Mehmeti në konferencën e djeshme për mediat. EGNATIA
Më tej, duke u fokusuar te kundërshtari, ai theksoi: “Egnatia është rritur shumë si skuadër, klubi ka ditur të menaxhojë situatën edhe për sa i takon merkatos. Ka bërë diferencën në kampionat me kualitetin që ka, duke arritur këto rezultate. Ka një filozofi loje të sajën dhe fakti që trajneri nuk është lëvizur, ndikon. Ka individë të veçantë, janë 3-4 lojtarë që i kanë dhënë shumë Superiores, kanë shumë eksperiencë. E respektojmë kundërshtarin në maksimum, por edhe ne vijmë nga një lojë në rritje javët e fundit dhe ko na jep entuziazëm. Jemi të vetëdijshëm për forcën e Egnatias dhe do të mundohemi t’i përgjigjemi lojës së saj, duke e goditur në pikat e dobëta dhe duke
marrë masa për pikat e forta. Edhe mungesat e Egnatias janë lojtarë me eksperiencë dhe kanë bërë diferencën në kampionat, si Aleksi ashtu edhe Ndreca, por edhe dy mungesat tona janë shtylla të skuadrës. Duke ditur ku i kemi ne mungesat, në çfarë pozicioni, dhe ku i kanë ata, mendoj se ndoshta janë ata më të favorizuar. Megjithatë, nisemi si të barabartë dhe do të bëjmë maksimumin, siç i takon Dinamos”.
STOLI
Mehmeti komentoi edhe lojtarët që vijnë nga stoli, të cilët mësë shumti janë afruar në merkaton e janarit. “Më vjen mirë për rritjen e cilësisë së lojës nga skuadra. Kemi një fizionomi loje tashmë, por kemi nevojë që gjatë gjithë 90minutëshit të kemi stabilitet, jo të biem në momente të caktuara. Skuadra duhet të ketë karakterin dhe ta menaxhojë
në mënyrën e drejtë lojën. Stoli? Prandaj Dinamo është një skuadër me shumë forca. Janë të gjithë të barabartë, por me vlera të ndryshme. E ritheksoj, ata që do të luajnë kundër Egnatias, besoj se do të bëjnë një prezantim shumë të mirë”, theksoi trajneri blu. KATËRSHJA
Në fund, Mehmeti komentoi edhe garën për katërshen e parë. “Unë do të thosha se gara për katërshen e parë nuk është vetëm me Tiranën. Tani jemi në një moment kyç të kampionat, të vështirë për të gjitha skuadrat. Faktor kyç mendoj se është sesi do të menaxhohet aspekti fizik, sepse ndikon edhe lodhja. Çdo gjë është e hapur dhe do të shohim javë pas jave. Janë edhe 33 pikë në lojë nga ky kampionat dhe është e paparashikueshme se çfarë mund të ndodhë”, përfundoi trajneri. FATJON RUPI
15.06.2024 SPANJË-KROACI ITALI-SHQIPËRI 18:00 21:00