Flamurtari bie në shtesë, Laçi mbetet në Superiore
Koha e rregullt u mbyll në barazim 1-1, vendosi freskia
Laçi dhe Flamurtari edhe në sezonin e ri do të militojnë në kategoritë respektive. Finalja e biletës së fundit për Superioren e sezonit 2024-2025 i ka mbetur Laçit, ku pas 120 minutash lojë plot tension arrin të fitojë në shtëpi në shifrat 3-1. Koha e rregullt u mbyll në barazim 1-1, ku në shtesën e pjesës së parë shënoi Melo për vendësit, ndërsa në të 63-ën kapiteni Dajko shënon autogol duke barazuar shifrat. Në shtesa kurbinasit arrijnë të shënojnë edhe dy gola të tjerë, me Melon me penallti dhe Mjakin duke i siguruar Laçit mbijetesën në elitë. Ndërsa Flamurtari ëhstë i detyruar që sërish të luajë në të Parën dhe ta synojë sërish rikthimin në Superiore.
PJESA E PARË- Takimi nisi i vrullshëm nga të dy ekipet, ku loja për rreth 10 minuta përqendrohet në mesfushë. Loja është e fortë ku nuk mungojnë edhe dyluftimet e ashpra. Në minutën e 10-të Shkurtaj ven në provë Dajsinanin me një gjuajtje tokazi, por intensiteti është u ulët dhe portieri arrin ta devijojë. E menjëhershëm është kundërpërgjigjja e kurbinasve që pa u mbushur ende një minutë rrezikojnë me Sobouale, por vlonjatëve u vjen në ndihmë shtylla pingule. Më pas për minuta të tëra mungojnë rreziqet në portat respektive, pasi loja përqendrohet kryesisht në mesfushë, ku skuadrat mundohen të bllokojnë njëratjetrën. Në minutën e 33-të Ujka provon me një gjuajtje nga jashtë zonës, por topi devijohet nda Ramadani. Në kuadrin e një minute, 41-42, arbitri Bastari bëhet protagonist duke ndaluar gjuajtjet e kurbinasve, pasi topi u përplas dy herë në trupin e tij. Në minutën e parë shtesë Kriviçiç, në një pozicion ballor në hyrje të zonës, ka një mundësi shënimi, por gjuajtja e tij ndalet nga portieri Dajsinani. Minuta e katërt shtesë, goditje dënimi për Laçin. Vendësit zbatojnë me sukses një skemë, ku Kryeziu shërben në zonë për Melon, i cili shënjestron kuadratin e poshtëm të portës së portierit Teqja dhe e dërgon topin në rrjetë. 1-0 për Laçin dhe në shkallët e stadiumit, por edhe në fushë shpërthen festa, madje edhe trajneri Cungu hyn në fushë duke festuar me lojtarët. Me golin e Melos u mbyll pjesa e parë.
PJESA E DYTË- Laçi e nis me një zëvendësim, ku Qato i dëmtuar ia lë vendin Manellarit. Kurbinasit mundohen të ulin ritmin e takimit dhe të
administrojnë golin e pjesës së parë. Në të 53-ën Beqja gjuan bukur drejt portës vendëse, por Dajsinani arrin të largojë rrezikun. Minuta 63. Indio Olivera nga e djathta e sulmit shërben në zonë, Dajko në tentativë për ta larguar topin në dërgon në portën e vete dhe
shifrat barazohen në 1-1. Me këtë autogol hapet ndeshja, por takimi nuk e ka grintën dhe rrezikshmërinë e pjesës së parë. Të dy trajnerët freskojnë formacionet, ku te Laçi Ujka ia lë vendin Myrtës, ndërsa te Flamurtari Kriviçiç dhe Diamanti zëvendësohen nga Paolo
Pjeshka dhe Vucaj. Në të 79- ën trajneri Memushaj ndëshkohet me karton të kuq për protesta ndaj gjyqtarit. 10 minutat e fundit flasin për vendësit që krijojnë disa mundësi shënimi, ku drithërima solli gjuajtja e Kurtit në të 88-ën, që u ndal nga trau i
portës. Koha e rregullt mbyllet në shifrat 1-1, kështu që sfida kalon në kohë shtesë.
SHTESAT- Shtesat 2 herë nga 15 minuta folën për vendësit, që arritën të shënojnë nga një gol për pjesë. Stafai vlonjat bëri 3 zëvendësime në fraksionin e parë, por pa rezultat. Në minutën e 108-të Prodani shërben një top në zonë, por “sfera” ndalet nga dora e hapur e Hasës dhe gjyqtari akordon penallti. Një minutë më pas është Melo që godet saktë nga pika e bardhë dhe shënon, 2-1 për kurbinasit. Tensioni është i pranishëm në shtesa, por gjyqtari
preferon që të mos ndëshkojë askënd edhe pse ka përplasje në fushë. Mjaki hyri në fushë në minutën e 113-të dhe pas tri minutash, me anë të një kundërsulmi në të djathtë, 21- vjeçari arrin të shënojë edhe golin e tretë. Ky gol solli tension në fushë, pasi vlonjatët e konsideruan në pozicion të parregullt dhe pankina kuqezi hyri në fushë duke protestuar te gjyqtarët. Në minutën e 120-të La Torre u ndëshkua me karton të kuq. Edhe minutat shtesë nuk e ndryshuan situatën dhe gjithçka u mbyll me fitoren 3-1 të Laçit.