Von Lesern für Leser

Die besten Geschichten und Gedichte

Das „gestohlene“Christkind

von Erich Stockinger

Am Tag nachn Heilign Abnd is da Christtag, und da gibt’s um neine a Hochamt. Da Pfarra gfreit se oiwei af de Mess, wei da is er se sicha, dass vü Leit in da Kircha hand, und genau so iss a des Jahr gwen.

Bummvoi is gwen, denkt er se hoamle, wia er na da Mess zfriedn durch sei Kircha geht. Vor da Krippn bleibt er steh und betracht ganz stolz de wunderschen aus Holz gschniatztn Figurn. Des is scho a begnadeter Schniatzer gwen, denkt er, und liebevoll streicht er iba s Jesukinderl, des er erscht gestern af d Nacht in d Krippn glegt hat. Da heart er, wia wer ganz hoamle d Kirchatia afmacht, wer wird denn hiatzt nu kemma, denkt er se und tuat an Schriat hinta a Säuln, dass man net glei siagt.

Da siagt er en Alexander, an Buam aus da zweitn Volksschuiklass, wia der ganz züstrebi afs Kripperl zuageht. Neugieri wart er, was da Bua vorhat. A Zeitl bleibt da Alexander vor da Krippn steh, dann greift er blitzschnell ums Jesuskinderl, steckts e d Rocktaschn, und scho rennt er bei da Kirchatia ausse. Des is so schnell ganga, dass da Pfarra koa Zeit zan Eigreifn ghat hat.

Dann rennt er aba nache, reißt d Kirchatia af und siagt grad nu, wia da Bua mit an Radl e da Kirchagassn davoflitzt. Na, den dawisch i nimma, denkt er se, aba er woaß eh, wo da Bua wohnt, und in da Schui hat ern a im Religionsunterricht. Des wird a gscheide Straf gebm, ibalegt er grad und geht ganz enttäuscht e d Kircha zruck. Is ja sunst ganz a brava Bua, da Alexander, was wird denn dem eigfalln sei.

Und daweil er nu so roat, heart er, wia wieda d Kirchatia afgeht, und da Alexander laut schnaufat e d Kircha einakimmt, za da Krippn geht, s Jesukinderl aus da Rocktaschn nimmt, und ganz behutsam legt ers wieda e d Krippn. Da geht da Pfarra va da Säuln fira und stöllt en Buam zua Red. Da Alexander schreckt se, aba ganz unschuldi sagt er dann:

Mei Mami hat gsagt, wann ma was verspricht, dann muaß mas a haltn, und i ha an Briaf ans Christkind gschriebn und ha ma a Radl gwünscht, und i ha en Christkind versprocha, wann i oas kriag dann derfs zwoa Rundn um d Kircha mitfahrn, und des Versprecha han i hiatzt eighaltn. Da hat da Pfarra hoamle lacha miassn und zan Alexander hat er gsagt, hast scho recht, was ma verspricht, des muaß ma eihaltn.