Sparen unerwünscht

„I hätt ma nie denkt, dass ma in aner Bank so zum Schuldnmachn animiert wird“, sagte Herr P. zum Bezirksrichter. „I frag mi nur, warum de Bankn no immer so tuan, als waratns alle eine Art ,Sparkassn‘, wann de Herrn gar net wolln, dass ma durt sparn tuat, sonst hätt’s ja de Sparzinsen net in Keller falln lassn. De wolln an doch alle an Kredit andrahn, ob ma eahm braucht oder net, des Ärgste in der Beziehung is ma vuriche Wochn passiert.

I hab auf mei Sparbüachl an Hunderter einzahlt, eigentlich wollt i ja zwa einzahln, aber ma geniert se ja scho, verwicklt mi beim Außegehn der Portier in a Gespräch und sagt: ,Was se allerweil für Geld da einetragn is nimmer schön! Se wissn eh, dass der Weltspartag jetzt nimmer Weltspartag, sondern Weltkredittag haßt (lacht)! Falls Se heuer wieder a Geschenk von uns wolln, müassn S endlich de Ruachlerei aufgebn und Ihna statt an Sparbüachl a Kreditbüachl nehma.‘

Sag i: ,Was is a Kreditbüachl?‘

Sagt der Portier: ,A Kreditbüachl is des Gegenteil von an Sparbüachl, Se gebn der Bank des Sparbüachl und kriagn dafür a Kreditbüachl!‘

Sag i: ,Für Kredite muass ma Zinsen zahln.‘

Mant er: ,Je mehr Se ohhebn, desto büllicher wird’s. Es gibt jetzt scho de Prämienkreditbüachln, da müassn S Ihna im Jahr mindestens tausend Euro drauf ausleichn. In dem Fall san de Kreditzinsen aber sogar a Lapperl.‘

Na guat‘, hab i gsagt. ,Aber a Bürgschaft tät i jedenfalls brauchn. Und da wüsst i niemand, den i mitbringa könnt.‘

,Bürgschaft?‘, hat der Portier gsagt. ,Was is des? Se manen vielleicht des Gedicht von Schiller, aber an Guatsteher für an Kredit brauchn S heutzutag nimmer. Ja, wann S wen mitbringan, is uns nur recht. Aber des muass wer sein, der was se ebenfalls an Kredit nimmt, sunst kann er dahambleibn.‘

,Liaber Herr‘, hab i gsagt. ,Se sehn, i hab a Sparbüachl, i brauch ka Darlehen.‘

,Wer braucht scho a Darlehen‘, hat der Portier gsagt. ,De was ans brauchertn, kri- agn sowieso kans. Aber wenn Se heuer zum Weltkredittag wieder a Geschenk habn wolln, fahrn S oh mit dem Sparbüachl! Nehmen S Ihna a Kreditbüachl! Falls Se wirklich so gstopft san und kan Euro brauchn, dann zahln Se halt des Geld vom Kreditbüachl wieder auf a Sparbüachl. Aber sagn S ja niemand, dass i Ihna des gsagt hab. Sunst war i de längste Zeit Portier.‘

Den Moment is scho der Herr Kreditkassen-, wüll sagen Bankdirektor kumma und hat den ,Portier‘ eigenhändig entfernt. Er war nie durt angstellt, sondern hat se einfach immer wieder vurn hingsetzt und Bledsinn gredt. Leider hat de Bank laut Direktor z wenig Personal, als dass dauernd kontrollieren könnten, ob se der Trunkenbold wiedermal beim Eingang hingsetzt hat.“

Der selbst ernannte Portier erhielt eine Verwarnung.