Aufs Maul schauen . . .
Kürzlich kam ein Kriminalbeamter zu einem Würstelstand. Er zeigte dem Besitzer die Fotografie eines Mannes und fragte, ob er den Gesuchten vielleicht kenne.
„Is des a Pinzgauer?“, fragte dieser.
„Wiaso a Pinzgauer?“, meinte der Kriminalbeamte. „I suach ja ka Pferd!“
„Nein“, sagte der Standbesitzer, „i wollt ja nur wissn, ob er a Brotesser is. Er könnt ja aa immer a Semmerl bestelln. Wissn S, i merk ma nämlich de Leit net nach de Gsichter, sundern nach eahnera Esserei. Da hamma aa, de beißn links, dann hamma aa, de beißn rechts, dann gibts de Lückenbeißer und de Brückenbeißer, de san de mit aner Zahnluckn und de mit aner Bruckn. Sowas fallt ma auf bei de Leit, aber a Gsicht merk i ma net. Wann aner zum Beispül an an Zahn zuzzlt oder se an Span wuzzlt, des haßt auf Hochdeutsch, er dreht sich eine Zigarette, dann is er bei mir registriert, da kenn i eahm unter Tausenden anderen auße, da brauch i kan Fingerabdruck und ka Büld, weil das sind Merkmale, Herr Inspektor! Es gibt da Kundschaft mit an süaßn Senf und mit an scharfn Senf, es gibt de ohne Senf und de mit sehr vül Senf, es gibt de Pußtawürschtlesser und de Debrezineresser, de Mitesser, de was bei an andern mitessn, de Oberberger-, Waldviertler- und Frankfurterkundn. Je nachdem, was sa se bestelln, kenn i de Leut aus- anander. Sage mir, was du isst, und ich sage dir, wer du bist! Schaun S, der Alte da ohne Zähnd, der bringt nur noch an zsammgschnittenan Leberkas obe. Des is a Leberkauer. Früher war er a Eberklauer, der hat de Wüldschwein in Lainzer Tiergarten gstohln und hat’s an de Wüldprethändler verdraht. Also, wia gsagt, Herr Inspektor: Wann Se bei mir wem suachn, brauchn S ma ka Büldl bringa, i schau kan in de Augn. Was über der Nasn is, interessiert mi net. I hab in dem Punkt etwas mit de Politiker gemein: I tua dem Volk aufs Maul schauen. Essn S aa a Würschterl, Herr Inspektor? A Paarl Klobasse? Was wolln S denn dazu? An Anschnitt, a Scherzl, a Laberl, a Weckerl oder a Salzstangerl oder a Brezerl? Se schaun auf amal so scharf! Kummt vielleicht gar scho der, den was Se suachn? Was, der is? Ah, den kenn i eh. Des is a Strizzi! Jetzt hat er Ihna gsehn! Jetzt rennt er!“
Es kam zu einer kurzen Verfolgungsjagd. Der Gesuchte war in Kürze eingeholt und wurde vor Gericht vom Bezirksrichter wegen Zuhälterei zu vier Wochen Freiheitsentzug verurteilt.