Musikalischer Autostopper
Bezirksrichter zu einem Autofahrer: „Wir setzen die gestrige Verhandlung fort! Sie haben kürzlich einen Autostopper mitgenommen, der eine große Trompete bei sich hatte!“
Der Autofahrer: „Ja. De Trompetn war so groß, dass in mein klan Auto gar net gnua Platz dafür war. Drum hat der Herr den Trichter von dera Trompetn beim Fenster ausseschaun lassn.
Und wia ma so gfahrn san, hat der Autostopper zu mir gsagt: ,Se san so a liaber Mensch, und Se san ma so sympathisch! Soll i a bissl blasn?‘
,Ja‘, hab i gsagt. ,I hab nix dagegn. Was für a Liadl spüln S ma denn vur?‘
,Wann S Ihna recht is‘, hat er gsagt, ,blas i Ihna a Liad, das zur Jahreszeit passt. Vül werdn S leider net hörn, weil der Trichter beim Fenster aussesteht. Aber i blas dementsprechend laut. Achtung, i fang an.‘
Drauf hat er auf seiner Trompetn zum Blasn angfangt. Sehr stark, i hab gsehn, wias eahm bei sein Ballonschädl de Adern aussetreibt. Aber weil ma nix ghört habn, hat er wieder aufghört. Und da is Folgendes passiert: Dadurch, dass i sehr schnell gfahrn bin, hats in dem Trompetntrichter den Fahrtwind einedruckt. Der starke Luftstrom hat se verkehrt durch de Trompetn bewegt, hat vurn beim Mundstückl de Stimmgaberln zum Schwinga bracht und hat uns dann des Liad als a verkehrter vurgspült. Bei dem Mundstückl von der Trompetn is auf amal in komprimierter Form, wia bei an Notnspritzerl, de Musik aussekumma. Und zwar im Vierteltakt, weils der Herr zerst im Dreivierteltakt eineblasn hat. Und wia i ghört hab ,IAM RED‘, des is der Liadanfang verkehrt glesn und haßt ,DER MAI‘, bin i vur Schreckn ganz rot wurdn und hab fast an Verkehrsunfall verursacht. Passiert is nix, i hab nur an Traktor ausweichn müassn, der verkehrt aus an Feldweg kumma is.
I bedaure den Vorfall, bin aber froh, dass de Gschicht vur Gericht verhandelt wird. Weil wann i des in an Wirtshaus derzähl, sagn de Leit glei Münchhausen zu mir.“
Der Trompetenbläser und Traktorfahrer werden bei der nächsten Verhandlung einvernommen.